पुल तर्न २० रुपैयाँ कर

बाग्लुङ । बाग्लुङ–पर्वत जोड्ने झोलुङ्गे पुल प्रयोग गरेवापत बाग्लुङ नगरपालिकाले स्थानीयसँग कर असुली गर्न थालेको छ ।

नगरपालिकाले बाग्लुङ नगरपालिकाको बाङ्गेचौर र कुस्मा नगरपालिकाको अदुवाबारी जोड्ने ५६७ मिटर लामो झोलुङ्गे पुल तरेवापत रु २० पूर्वाधार कर असुल गर्न थालेको हो । स‌ंघीय सरकारले निर्माण गरेको उक्त पुल नेपालकै लामो दावी गरिँदै आएको छ ।

नगरपालिकाले मङ्गलबारदेखि लागू हुनेगरी ज्येष्ठ नागरिक, अपाङ्गता भएका र विद्यार्थीलाई प्रतिव्यक्ति रु १० र अन्य व्यक्तिलाई रु २० कर लिने निर्णय भएको बाग्लुङ नगरपालिकाका नगर प्रमुख जनकराज पौडेलले बताए ।

बागलुङ–पर्वत जिल्लाबासीलाई भने कर नलाग्ने नगरपालिकाले जनाएको छ । पुलमार्फत ओहरदोहर गर्ने कर तिर्नु पर्ने भएपछि सामाजिक सञ्जालमा नगरपालिकाको आलोचना भएको छ ।