स्वास्थ्य केन्द्रका कर्मचारीले बिरामीमाथि दुर्व्यबहार गर्न लागेपछि स्थानीयले नगरपालिका घेरे – Nepal Press

स्वास्थ्य केन्द्रका कर्मचारीले बिरामीमाथि दुर्व्यबहार गर्न लागेपछि स्थानीयले नगरपालिका घेरे

सुर्खेत । वीरेन्द्रनगर नगरपालिकाको आडैमा वडा नम्बर ८ को शहरी स्वास्थ्य केन्द्र छ । २०७६ सालमा स्थापना भएको उक्त केन्द्रमा स्थानीयले उपचार पाउनै छोडेका छन् । उनीहरुलाई त्यहाँ जाँदा न औषधि दिइन्छ न त चेकजाँच नै गरिन्छ ।

नजिकै स्वास्थ्य केन्द्र हुँदा गाह्रो साह्रो परेको समयमा उपचार गर्न पाइएला भन्ने स्थानीयवासीको आशा तब निराशामा परिणत भयो जब त्यहाँका स्वास्थ्य कर्मचारी सेवाग्राहीलाई अपशब्द बोल्न थाले । कार्यालयमा कहिल्यै समयमा नआउने, सेवाग्राहीलाई राम्रो व्यवहार नगर्ने भएपछि स्थानीयहरु नगरपालिका घेराउ गर्न आए ।

‘जहिल्यै स्वास्थ्य संस्थामा हामी जाँदा वा हाम्रा वृद्ध आमाबुवा जाँदा कर्मचारी नभेटिने, भेटिए पनि स्वास्थ्य जाँच नगर्ने, उनीहरुलाई औषधि छैन भन्ने अनि सकेसम्म उपचार गर्न आनाकानी गर्ने बानी कर्मचारीहरुमा देखियो,’ स्थानीय प्रेम थापाले नेपालप्रेससँग गुनासो गर्दै भने, ‘बुढापाकालाई स्वास्थ्य संस्था भित्र नल्याउनेसम्मका गैरजिम्मेवार हर्कत बढदै गएपछि हामी आन्दोलित हुन बाध्य भएका हौं ।’

अर्का युवा विनम्रप्रताप सिंहले नगरपालिकाले स्वास्थ्य संस्थाबाट पाइने सेवा सहज बनाउन भूमिका खेलोस भन्ने चाहनाले नगरपालिका घेराउ गर्न बाध्य भएको प्रतिक्रिया दिए । ‘उपचार पाइने स्थानमा अपहेलना भएपछि वा स्वास्थ्य संस्थामा काम गर्नेले सेवा प्रवाह नगरेपछि त्यो संस्थाको औचित्य छैन । संस्थालाई कि राम्रो बनाउ कि खारेज गर भन्ने मागसहित हामी यहाँ आएका हौं ।’ उनले आफूहरुको माग पुरा नभएपछि अरु आन्दोलन गर्न लागेको बताए ।

स्थानीय तुलसी पुलामी भन्छिन्, ‘सेवा लिन जाँदा कर्मचारीले वेवास्ता गर्ने र आफ्ना समस्या राख्दा झर्किने गर्दछन् । सेवाग्राही आउँदा मोबाइलमा वाइफाई चलाएर बस्छन् ।’

यता, नगरपालिकाका प्रमुख प्रशासकीय अधिकृत टिकाराम ढकालले नागरिकहरु नगरपालिकामा आएपछि मात्रै घटनाको जानकारी भएको बताए । ‘त्यसअघि हामीलाई के भएको छ भन्ने जानकारी थिएन । उहाँहरु कार्यालयमा आउनु भएपछि मात्रै हामीले जानकारी पाएका हौं,’ उनले भने, ‘हामी स्वास्थ्य केन्द्रका इन्चार्ज सहितका कर्मचारीलाई कार्यालयमा बोलाउँछौं । के भएको हो बुझ्छौं । उनीहरुको गल्ती भए कारवाही गर्छौं ।’

 

प्रतिक्रिया

Leave a Reply

Your email address will not be published. Required fields are marked *