दुर्गा प्रसाईको आरोप : कलेजलाई सम्बन्धन माग्दा गिरीले २० करोड मागे (भिडियो)

काठमाडौं । बि एण्ड सी मेडिकल कलेज तथा टिचिङ हस्पिटल एवम् रिसर्च सेन्टरलाई सम्बन्धन माग्दा चिकित्सा शिक्षा आयोगका उपाध्यक्ष श्रीकृष्ण गिरीले २० करोड घुस मागेको कलेजका कार्यकारी निर्देशक दुर्गा प्रसाईले आरोप लगाएका छन् ।

शनिबार काठमाडौंमा पत्रकार सम्मेलन गर्दै प्रसाईले गिरी आयोगका उपाध्यक्ष हुनसमेत योग्य नभएको टिप्पणी गर्दै कलेजलाई सम्बन्धन माग्दा २० करोड घुस मागेको बताएका हुन् ।

‘गिरी कानुनअनुसार आयोगका उपाध्यक्ष हुन पनि योग्य छैनन्’ प्रसाईले भने, ‘कलेजलाई सम्बन्धन दिनका लागि उहाँले मसँग २० करोड घुस माग्नु भएको थियो, नदिएर अख्तियारमा गएपछि उहाँ मप्रति पूर्वाग्राही हुनुहुन्छ ।’

प्रसाईले कलेजलाई सम्बन्धन दिने, सरकारले नै चलाउने वा बन्द गर्नेबारे छिटो निर्णय प्रधानमन्त्रीसँग आग्रह पनि गरेका हुन् ।