प्रदेश र स्थानीय सरकारसँग समन्वय गरी बजेट ल्याउन पर्यटन बोर्डलाई सुझाव – Nepal Press

प्रदेश र स्थानीय सरकारसँग समन्वय गरी बजेट ल्याउन पर्यटन बोर्डलाई सुझाव

काठमाडौं । पर्यटन क्षेत्रका विज्ञहरूले कोरोना महामारीबाट थलिएको पर्यटनलाई पुनरुत्थान गर्न संघ, प्रदेश र स्थानीय तहसँग समन्वय गरी बजेट ल्याउन नेपाल पर्यटन बोर्डलाई सुझाव दिएका छन् ।

उनीहरूले यो सयममा पर्यटकीय गतिविधि ठप्प हुँदा बोर्डको बजेटको आकार समेत खुम्चिने भन्दै भएको बजेटबाट सीमित तर प्रभावकारी काम गर्न समेत बोर्डलाई सुझाव दिए ।

बोर्डले आव २०७८/७९ को बजेटका सन्दर्भमा बिहीबार आयोजना गरेको भर्चुअल अन्तरक्रियामा विज्ञहरूले सीमित स्रोतको अधिकतम प्रयोग हुने गरी कार्यक्रम तर्जुमा गर्न माग गरेका छन । उनीहरुले स्वास्थ्य सुरक्षालाई ध्यान दिँदै खोपको सुनिश्चितता गर्न र पर्यटनलाई चलायमान बनाउदै लैजानु पर्नेमा जोड दिए । पूर्वगभर्नर दिपेन्द्रपुरुष ढकालले पर्यटन प्रवर्द्धन गर्न संघीय सरकारले बोर्डलाई अनुदान दिनु पर्ने औंल्याए ।

विज्ञ डा. विष्णुप्रसाद गौतमले विगतमा भएका कार्यहरूको समीक्षा गर्दै तीनै तहका सरकारबीच समन्वय गरेर बजेट निर्माण तथा पर्यटन प्रर्वद्धनका कार्यक्रम ल्याउनु पर्ने धारणा राखे । अर्का विज्ञ डा. प्रेम शर्माले तत्काल अन्तर्राराष्ट्रिय पर्यटक आउने सम्भावना कम रहेकोले आन्तरिक पर्यटन प्रवर्द्धन गर्ने खालको बजेट तर्जुमा गर्न सुझाव दिए । यस्तै विज्ञहरू प्राध्यापक डा. सोमप्रसाद खतिवडा, रामचन्द्र सेडाइ, चेतनाथ कंडेल तथा सूर्यकिरण श्रेष्ठले बोर्डले सरोकारवालाई समेटेर कम्तीमा २ देखि ३ वर्षको रिकभरी र रिभाइवल योजना बनाउनु पर्ने सुझाव दिए ।

विज्ञहरू डा. आलोक राई, रमेश उपाध्याय र पशुपति न्यौपाने र ज्ञानेन्द्ररत्न तुलाधरले कोभिड चुनौतीसँगै अवसर पनि भएकोले यो समयमा जनशक्ति विकास, पर्यटकीय प्रडक्टको विकास गर्दै डिजिटल मार्केटिङमा जोड दिनु पर्ने बताए । यसैगरी पर्यटन व्यवसायीहरू विजय अमात्य, विक्रम पाण्डे काजी र सिएन पाण्डेले स्रोतको कमी भएको अवस्थामा प्राथमिकता निर्धारण गरेर काम गर्न आग्रह गर्दै पूर्वाधार भन्दा नयाँ पर्यटकीय प्रडक्ट र बजारीकरणलाई जोड दिनेगरी बजेट बनाउन बोर्डलाई आग्रह गरे ।

अन्तरक्रियामा बोर्डका उपाध्यक्ष तथा स्रोत व्यवस्थान एवं कार्यक्रम तथा बजेट व्यवस्थापन समितिका संयोजक चन्द्रप्रसाद रिजालले कोभिडको कारण पर्यटन व्यवसाय ठप्प भएको अवस्थामा बोर्ड बजेट निमार्णको चरणमा रहे पनि सीमित साधनबाट अधिकतम काम गर्ने गरी आफूहरूले तयारी गरिरहेको जानकारी दिए । उनले विज्ञहरूका सुझावलाई समेटेर बोर्डले नीतिगत सुधारका काम अगाडि बढाउने बताए । उनले थोरै बजेट भए पनि सातै प्रदेशमा केही देखिने गरी काम गर्ने योजनामा बोर्ड रहेको र विज्ञहरुका सुझावले बजेट निर्माणमा सहयोग पुग्ने बताए ।

बोर्डका अर्का सदस्य कृष्ण शाह तथा पम्फा पौडेल धमलाले कठिन परस्थितिमा पनि बोर्डले स्रोत व्यवस्थापनका लागि विभिन्न निकायहसँग समन्वय गरिरहेको जानकारी दिए ।

यसैबीच बिहीबार नै बोर्डले बजेटका सनर्दभमा सञ्चारकर्मीसँग पनि अन्तरक्रिया आयोजना गरेको थियो । कार्यक्रममा पत्रकारहरुले स्रोतको अभावका समयमा सीमित तर प्रभावकारी योजनामा मात्र रकम खर्च गर्न, डिजिटल मार्केटिङ र आन्तरिक पर्यटन प्रवर्द्धनका कार्यक्रम ल्याउन बोर्डलाई सुझाव दिए ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर