सर्वोच्चमा अवहेलना मुद्दाको ओइरो, चार पूर्वप्रधानन्यायाधीश र दमननाथविरुद्ध पनि निवेदन – Nepal Press

सर्वोच्चमा अवहेलना मुद्दाको ओइरो, चार पूर्वप्रधानन्यायाधीश र दमननाथविरुद्ध पनि निवेदन

काठमाडौं । संवैधानिक इजलासमा प्रतिनिधिसभा विघटनविरुद्धका रिटमाथि सुनुवाइ चलिरहेका बेला सर्वोच्च अदालतमा अवहेलना मुद्दाको लागि निवेदन थपिने क्रम बढ्दो छ । सर्वोच्च प्रशासनले अहिलेसम्म कुनै निवेदन दर्ता भने गरेको छैन ।

प्रधानमन्त्री केपी शर्मा ओलीले वरिष्ठ अधिवक्ता कृष्णप्रसाद भण्डारीको सन्दर्भमा व्यक्त गरेको भनाइले अदालतको अवहेलना भएको भन्दै आइतबार अवहेलनाको निवेदन पेश भएको थियो । तर सो निवेदन दर्ता नहुँदै सोमबार थप तीनवटा निवेदन गएका छन् ।

पूर्व प्रधानन्यायाधीशहरु कल्याण श्रेष्ठ, मीनवहादुर रायमाझी, अनुपराज शर्मा र सुशीला कार्कीले अदालतमा विचाराधीन मुद्दा प्रभावित पार्ने गरी वक्तव्य निकालेर न्यायलयमाथि अवहेलना गरेको भन्दै अवहेलना मुद्दा चलाउन निवेदन परेको सर्वोच्च स्रोतले जनाएको छ ।

त्यस्तै पूर्व सभामुख दमननाथ ढुंगानाले पनि अदालतको अवहेलना हुने गरी अभिव्यक्ति दिएको भन्दै निवेदन परेको बताइएको छ । कुनै पनि निवेदन दर्ता भएका छैनन् । यी विषय संवैधानिक इजलासमा वकिलहरुले उठाउँदा पनि प्रधानन्यायाधीशले बाहिरका कुरामा प्रवेश नगर्न आग्रह गर्दै आएका छन् ।

प्रतिक्रिया

Leave a Reply

Your email address will not be published.