चितवन कांग्रेसका नेताहरु बागी उम्मेदवारको घरमै, जगन्नाथले मानेनन् उम्मेदवारी फिर्ता लिन

चितवन । नेपाली कांग्रेस चितवनको नेतृत्वले भरतपुर महानगरपालिकाको प्रमुखमा स्वतन्त्र उमेदवारी दिएका नेता जगन्नाथ पौडेललाई भेट गरेको छ ।

सभापति राजेश्वर खनालको नेतृत्वमा गएको टोलीले पूर्वसांसद पौडेललाई भेटेर आफ्नो निर्णयमा पुनर्विचार गर्न आग्रह गरेका हुन् । मंगलबार साँझ कृष्णपुरस्थित पौडेलनिवासमा कांग्रेसका नेताले संस्थागतरुपमै यस्तो आग्रह गरेका हुन् ।

टोलीमा उपसभापति राजिव न्यौपाने र सचिव सूर्य अर्याल थिए । ‘उहाँ जुन बाटो हिँड्दै हुनुहुन्छ त्यो बाटोमा पुनर्विचार आग्रह गर्यौं’, सभापति खनालले भने, ‘उहाँलाई हामीले आफ्नो तर्फबाट कुरा गर्यों । उहाँले पुनर्विचार गर्नुहन्छ भन्ने विश्वास गरेका छौं ।’

गठबन्धनको निर्णयअनुसार पार्टीलाई सहयोग गर्न पनि टोलीले आग्रह गरेको थियो ।

गठबन्धनले भरतपुरको महानगर प्रमुखमा नेकपा माओवादी केन्द्रलाई दिएर उपप्रमुख कांग्रेसले लिएको छ । उपप्रमुख सहित २९ वडामध्ये कांग्रेसले २० वटा वडा लिएको छ । कांग्रेसलाई प्रमुख नदिएको भन्दै असन्तुष्ट पौडेलले स्वतन्त्र उमेदवारी हालेका थिए ।