ज्ञानेन्द्र मल्लले भने- ब्याट र बल छोड्नुपर्ने अवस्था आउन सक्छ, क्यानले पुनर्विचार गरोस् (भिडिओ)

काठमाडौं । नेपाल क्रिकेट संघ (क्यान) बाट कारबाहीमा परेका राष्ट्रिय टिमका कप्तान ज्ञानेन्द्र मल्लले संघको निर्णयमा पुनर्विचार गर्न अनुरोध गरेका छन् । आफ्नो हक-अधिकारका लागि आवाज उठाएकै आधारमा कारबाही हुने हो भने ब्याट र बल छोड्नुपर्ने अवस्था आउन सक्ने उनले चेतावनी दिए ।

आज आयोजित पत्रकार सम्मेलनमा मल्लले प्रश्न गरे, ‘हामीले आजसम्म गरेका समर्पणको सम्मान यही हो ?’

संवादमा गएर क्यानले समस्याको निकास निकाल्नुपर्ने मल्लले बताए ।

‘हाम्रो फोकस भनेको उहाँहरूले संवादमा बोलाउनुपर्छ भन्ने नै हो,’ उनले भने ।

यदि क्यानले संवादमा बोलाएर खेल्ने वातावरण बताइयो भने राष्ट्रिय टिमबाट खेल्ने मल्लले बताए । ‘हामी संवादबाटै अगाडि जानुपर्ने पक्षमा छौं । कारवाही फिर्ता हुने नहुने उहाँहरुले बोर्डमा निर्णय लिनुहोला,’ मल्लले भने ।

पत्रकार सम्मेलनमा ज्ञानेन्द्रसहित कारबाहीमा परेका दीपेन्द्रसिंह ऐरी, सोमपाल कामी र कमलसिंह ऐरी उपस्थित थिए । उनीहरुले आफूहरूको साझा धारणा भएको बताए ।