उत्तर कोरियाली राजनीतिक बैठकमा किमजोङले भने : महामारीले भोकमरी आउनसक्ने जोखिम बढ्यो

प्योङयाङ । उत्तर कोरियाली नेता किमजोङ उनले कोभिड-१९ संक्रमण रोकथामका लागि गरिएको विश्व्यापी लकडाउनको आर्थिक असर आफ्नो देशमा पर्ने बताएका छन् ।

राजधानी प्योङयाङमा आयोजित उच्च स्तरिय राजनीतिक बैठकलाई सम्बोधन गर्दै उनले देशमा खाद्य संकट देखापरेको र भोकमरी सुरु हुने सक्ने समेत बताए ।

अर्थतन्त्र कमजोर बनेपछि छलफलका लागि उनले उत्तर कोरियामा वृहत राजनीतिक छलफलको आयोजना गरेका थिए । वर्तमान अन्तर्राष्ट्रिय अवस्थाको कारण उत्तर कोरियालाई असर पुगेको उनको उध्दृत गर्दै उत्तर कोरियाली न्यूज एजेन्सीले जनाएको छ ।

कोभिड-१९ संक्रमण रोकथामका लागि अन्तर्राष्ट्रिय सीमा बन्द गर्दा चीनसँगको व्यापार प्रभावित भएको थियो । विनाशकारी आँधी र बाढीले पनि यसवर्ष उत्तर कोरियामा कृषि उत्पादन कम हुने देखिएको छ ।

बहुसंख्यक जनतालाई असर पर्ने गरि भोकमरी हुने संकेत तत्काल नदेखिएपनि केही विश्लेषकले नागरिकमा पीडा क्रमशः सुरुवात हुनसक्ने जनाएका छन् ।