बर्ड फ्लु देखिएसँगै घट्यो कुखुराको मासुको भाउ – Nepal Press

बर्ड फ्लु देखिएसँगै घट्यो कुखुराको मासुको भाउ

काठमाडौं । कुखुराको मासुको मूल्य प्रतिकेजी २० रूपैयाँ घटेको हो । कुखुराको मासु प्रतिकेजी ३७० बाट घटाएर ३५० रूपैयाँ तोकिएको छ ।

लकडाउनपछि बढेको कुखुराको मासुको भाउ बर्ड फ्लु देखिएसँगै घटाइएको छ । राष्ट्रिय कुखुरा बिक्री व्यवसायी संघका अध्यक्ष जगबहादुर बीसीले बर्ड फ्लु झन फैलियो भने अझै मासुको मूल्य घट्ने बताए । उनले भने, ‘बर्ड फ्लुलाई यतिमा नै रोक्न सकियो भने मासुको मूल्य घट्दैन ।’

काठमाडौंको तारकेश्वर-७ फुटुङमा एक किसानले पालेका हाँस-कुखुरामा शुक्रबार बर्ड फ्लु देखिएपछि पशु सेवा विभागले पन्छी र पन्छीजन्य पदार्थको आयातमा रोक लगाएको छ । पन्छी र पन्छीजन्यको भेटेरिनरी जाँच गराएर स्वस्थ प्रमाणित भएका पशुपन्छीमात्रै कारोबार गर्न विभागले सुझाएको छ ।

बर्ड फ्लु देखिएको क्षेत्र तारकेश्वर पुगेर विभागको टोलीले शनिबार १८ सय ६५ वटा हाँस, ६२२ वटा बट्टाइ, ३२ वटा कुखुरा र २५ वटा टर्की मारेर गाडेको छ। साथै उक्त क्षेत्रबाट ५४२ वटा अन्डा र ७५ केजी दाना पनि नष्ट गरिएको विभागले जनाएको छ ।

प्रतिक्रिया

Leave a Reply

Your email address will not be published.