शेफिल्डसँग म्यानचेस्टर युनाइटेडको अप्रत्यासित हार – Nepal Press

शेफिल्डसँग म्यानचेस्टर युनाइटेडको अप्रत्यासित हार

एजेन्सी । अंकतालिकाको अन्तिममा रहेको शेफिल्ड युनाइटेडले इंग्लिस प्रिमियर लिगमा म्यानचेस्टर युनाइटेडको उपाधि दौडमा धक्का दिँदै ओल्ड ट्राफोटमा आश्यर्चजनक जित निकालेको छ । यो हारपछि म्यानचेस्टर युनाइटेडले लिगको शीर्ष स्थानमा उक्लने अवसरसमेत गुमायो ।

ओले गनर सोल्सायर प्रशिक्षित म्यानचेस्टर युनाइटेडलाई चीर प्रतिस्पर्धी म्यानचेस्टर सिटीलाई पछि पार्न ३ अंक आवश्यक थियो । तर खेल अवधिभर उनीहरुको प्रयासले काम गरेन । शेफिल्डका लागि सिजनको दोस्रो जित हो ।

शेफल्डले पहिलो हाफमा अप्रत्यासित रुपमा अग्रता बनाएको थियो । जोन फ्लेकले कर्नरबाट दिएको पास सदुपयोग गरी किन ब्रायनले २३ औं मिनेटमा फ्लिक हेडरमार्फत गोल गरेका थिए । पहिलो हाफमा एन्थोनी मार्सलको गोल भिडियो असिस्टेन्ट रेफ्रीले रद्ध गरिदिएको थियो ।

दोस्रो हाफमा युनाइटेडका कप्तान ह्यारी मगायरले बरारबी गोल फर्काए । उनले ६४ औं मिनेटमा गोल गरेका हुन् । तर अन्तिम १६ मिनेट बाँकी हुँदा शेफिल्डका लागि सब्स्टिच्युड खेलाडी ओलिभर बुर्केले गोल गरे र सिजनकै चर्चित जित दिलाए । सन् १९९२ देखि नयाँ शैलीको प्रिमियिर लिग सुरु भएयता शेफिल्डले म्यानचेस्टर युनाइटेडमाथि जित हासिल गर्न सकेको थिएन ।

‘ओल्ड ट्राफोटमा जितका लागि प्रतीक्षा थियो । यो विशेष प्रदर्शनबाट विशेष परिणाम निस्किएको छ,’ शेफिल्डका प्रशिक्षक क्रिस वाइल्डरले भने, ‘मैले यो भनिरहेको छैन कि यस्तो अविश्वसनीय प्रदर्शन जारी रहोस तर म देलाउन चाहन्छु कि हामी के हौं ।’

वाइल्डरको शेफल्ड युनाइटेड अंकतालिकाको अन्तिममा छ । उसले २० खेलबाट ८ अंक जोडेको छ । रेलिगेसन क्षेत्रबाट १० अंकले पछाडि छ । समान खेलबाट ४० अंकसहित म्यानचेस्टर युनाइटेड दोस्रो स्थानमा छ । एक खेल कम खेलेको म्यानचेस्टर सिटीको १ अंक बढी छ ।

प्रतिक्रिया

Leave a Reply

Your email address will not be published.