मनिषा कोइरालाको आत्मकथा नेपालीमा

मनिषा कोइरालाको आत्मकथा ‘हिल्ड’ नेपाली भाषामा प्रकाशन भएको छ । नेपाली संस्करणको नाम ‘जिजीविषा : क्यान्सरले दिएको नयाँ जीवन’ राखिएको छ । स्वरुप आचार्यले नेपालीमा अनुवाद गरेका हुन् ।

नीलम कुमारले लेखेको मनिषाको अंग्रेजी संस्करण यसअघि निकै रुचाइएको मेमाइर हो । क्यान्सरबाट निको हुन मनिषाले गरेको संघर्ष र जीवनप्रति उनको दृष्टिकोणलाई पुस्तकमा समावेश गरिएको छ ।

साथै, बलिउड अभिनेत्री प्रियंका चोपडा जोनसको अटोबायोग्राफी ‘अनफिनिस्ड’ रिलिज तयारीमा छ । इन्स्टाग्राममार्फत प्रियंकाले पुस्तक प्रकाशन तयारीमा रहेको बताएकी छन् । बलिउड संघर्ष, हलिउड करियर र प्रेम सम्बन्धलाई पुस्तकमा वर्णन गरिएको छ ।

‘अनफिनिस्ड शब्दले मेरो जीवनमा गहिरो अर्थ राख्छ । जुन मेरो जीवनको एउटा साझा धागो पनि हो’ प्रियंकाले लेखेकी छन् । नेपालमा यसअघि अभिनेता भुवन केसी, अभिनेत्री नम्रता श्रेष्ठको जीवनमाथि बायोग्राफी लेखिने बताइए पनि अहिलेसम्म पूरा भएको छैन ।

हलिउडका नेपाली फेसन डिजाइनर प्रबल गुरुङले पनि आगामी वर्ष अटोबायोग्राफी प्रकाशन गर्ने तयारीमा छन् । प्रबलले सिंगापुरमा जन्मिएको, नेपालमा हुर्किएको र मुम्बई एवं न्यूयोर्कमा गरेको संघर्षलाई मेमोइरमा चित्रण गर्ने जनाइएको छ ।