‘सतीदेवी’ सर्वोत्कृष्ट फिल्म, मलिका महत सर्वोत्कृष्ट अभिनेत्री

काठमाडौं । रामेछापमा सम्पन्न तेस्रो नेपाल ग्रामीण चलचित्र महोत्सवमा लक्ष्मण सुवेदी निर्देशित ‘सतीदेवी’ सर्वोत्कृष्ट सिनेमा घोषित भएको छ । यही फिल्मबाट अभिनेत्री मलिका महतले उत्कृष्ट अभिनेत्रीको जुरी मेन्सन अवार्ड हात पारिन् ।

महतले अवार्ड लिएपछि सामाजिक सञ्जालमा लेखेकी छन्, ‘एक्टिङ करियरमा मलाई यो अवार्डले अत्यन्त धेरै हौसला, प्रेरणा र ऊर्जा थपेको महसुस गरेकी छु ।’

यस्तै निर्देशनमा ‘दिमाग खराब’बाट निश्चल बस्नेत सर्वोत्कृष्ट घोषित भए । ‘दिमाग खराब’बाटै अभिनेत्री स्वस्तिमा खड्का सर्वोत्कृष्ट अभिनेत्री हुँदा ‘नाङ्गो गाउँ’बाट दयाहाङ राई सर्वोत्कृष्ट अभिनेता घोषित भए । यस्तै ‘सतीदेवी’ले उत्कृष्ट पटकथाको अवार्ड पनि जित्यो ।

सत्यराज चौलागाईँ निर्देशित तथा मुकुन भुसाल अभिनीत ‘विच्छेद’ले जुरी मेन्सन अवार्ड जित्यो । यस्तै अन्य विभिन्न विधाहरूमा समेत अवार्ड वितरण गरिएको थियो ।