‘घरज्वाइँ’ को फर्स्टलुक पोस्टरमा दयाहाङ र मिरुनाको गाउँले रुप

काठमाडौं । मगर संस्कृतिमा आधारित चलचित्र ‘घरज्वाइँ’ को फर्स्टलुक पोस्टर सार्वजनिक गरिएको छ ।

अनिल बुढामगरको निर्देशनमा जनक घर्तीमगरले निर्माण गरेको चलचित्रका दुई डिजाइनका पोस्टरमध्ये एउटामा अभिनेता दयाहाङ राई र अभिनेत्री मिरुना मगर बोराको भारी बोकिरहेको देख्न सकिन्छ । अर्को डिजाइनमा दयाहाङ, मिरुनालगायत चलचित्रका सबै प्रमुख कलाकारलाई समेटिएको छ ।

चलचित्रको केही साताअघि क्यारेक्टर लुक्स सार्वजनिक गरिएको थियो । बुधबार अफिसियल फर्स्टलुक दर्शकमाझ ल्याइएको हो ।

पूर्वी रुकुम आसपासमा करिब एक महिना छायाँकन गरिएको चलचित्रको कथा पनि निर्देशक अनिलले लेखेका हुन् । पटकथा, संवाद लेखनमा भने उनलाई विनोद खतिवडा र सुवास कोइरालाले साथ दिएका छन् ।

जीएम मुभिजको ब्यानरमा निर्माण भएको चलचित्र सुसन प्रजापतिले खिचेका हुन् । चलचित्रका गीतमा हर्क साउद र मनोज थापाको शब्द र संगीत रहेको छ ।

कृष्ण भण्डारीले सम्पादन गर्ने चलचित्रको डिजिटल पार्टनर बुढा सुब्बा डिजिटल हो । एमएसएम, अष्ट्रेलियाले अन्तर्राष्ट्रिय प्रदर्शन अधिकार लिइसकेको छ । चलचित्रलाई नेपाल वितरण आरआर फिल्मस्ले गर्दैछ ।

असार २८ गते प्रदर्शन हुने ‘घरज्वाइँ’ मा दयाहाङ र मिरुनाका साथमा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, वीना थापामगर, सोनाम लामा, विवेश बुढा मगर, सुनिल मगरले अभिनय गरेका छ्न् ।