बी डिभिजन लिगमा मध्यपुरको पहिलो जित

काठमाडौं । शहीद स्मारक ‘बी’ डिभिजन लिगमा शुक्रबार मध्यपुर युथ एसोसिएसनले सिजनको पहिलो जित दर्ता गरेको छ । सातदोबाटोस्थित एन्फा कम्प्लेक्समा भएको खेलमा मध्यपुरले टुसाल युथ क्लबलाई २-० को नतिजामा पराजित गर्‍यो । मध्यपुरलाई महत्त्वपूर्ण तीन अंक दिलाउन धिरज श्रेष्ठ र कैलाश लामिछानेले १-१ गोल गरे ।

धिरजले २३औं मिनेट गरेको गोलसँगै पहिलो हाफमा मध्यपुरले १-० को अग्रता लिएको थियो । दोस्रो हाफमा पनि गोलका लागि सुरुआतदेखि प्रयासरत मध्यपुरका लागि कैलाशले ६०औं मिनेटमा गोल गर्दै २-० को जित सुनिश्चित गरे ।

जितसँगै ७ खेलबाट ४ अंक बटुलेको मध्यपुर ११औं स्थानमा उक्लिएको छ । पराजित टुसाल समान ७ खेलबाट ८ अंकसहित सातौं स्थानमा छ ।