एकीकृत समाजवादीले दीपक मनाङेलाई स्पष्टीकरण सोध्ने

पोखरा । नेकपा एकीकृत समाजवादीले गण्डकी प्रदेशका भौतिक पूर्वाधार तथा यातायात मन्त्री राजीव गुरुङ (दीपक मनाङे)लाई स्पष्टीकरण सोध्ने भएको छ ।

नेकपा एसको बुधबार बसेको केन्द्रीय सचिवालय बैठकले पार्टीलाई सल्लाह नगरी मन्त्री बनेको भन्दै मनाङेलाई स्पष्टीकरण सोध्न प्रदेश कमिटीलाई निर्देशन दिने निर्णय गरेको सचिव जीवनराम श्रेष्ठले जानकारी दिए ।

स्पष्टीकरण काम प्रक्रियामै रहेको नेकपा एस गण्डकी प्रदेश इन्चार्ज श्रीनाथ बरालले बताए । ‘पहिलो चरण हामीले स्पष्टीकरण नै सोध्ने हो र यो केन्द्रले गर्ने हो । मुल रुपमा सोध्ने केन्द्र नै हो । जुन प्रक्रियामा छ । केन्द्रले सिधै सोध्छ की प्रदेश कमिटीमार्फत पठाउन त्यो चाहिँ हेर्न बाँकी छ,’ उनले भने ।

स्वतन्त्र जितेर नेकपा एस प्रवेश गरेका मनाङेले आइतबार पार्टी छोडेको भन्दै स्वतन्त्र हैसियत बनाउन प्रदेश सभा सचिवालयमा निवेदन दिएका थिए । निवेदन दिएको २४ घन्टा नबित्दै मनाङेलाई गण्डकीका मुख्यमन्त्री सुरेन्द्रराज पाण्डेले भौतिक पूर्वाधार विकास तथा यातायात व्यवस्था मन्त्रीको जिम्मेवारी दिएका थिए ।