इजरायलमा फसेका थप ७ नेपाली महेन्द्रनगर हुँदै घर फर्किए

कैलाली । इजरायलमा फसेका थप ७ नेपाली आज घर फर्किएका छन् । इजरायलबाट उद्धार गरी दिल्ली ल्याइएका नेपालीहरूलाई दिल्लीस्थित नेपाली दूतावासले सवारी साधनको व्यवस्था गरि आज नेपाल पठाएको हो । दिल्ली आएका १८ मध्ये ७ जना गड्डाचौकी नाका हुँदै महेन्द्रनगर पुगेका थिए ।

कैलाली टीकापुरका नन्दसिंह पुन, नुवाकोट लिखुका राजकुमार मानन्धर, काठमाडौँका लक्ष्मी दुलाल, मोरङ उर्लाबारीका निश्चल सिंह, पाल्पाकी दिलकुमारी अधिकारी, ललितपुरकी ममता थापा र स्याङ्जाकी अस्मिता गुरुङ महेन्द्रनगर पुगेको र उनीहरूलाई घर पठाइसकिएको कञ्चनपुरका प्रमुख जिल्ला अधिकारी गोपालकुमार अधिकारीले बताए ।