भोजपुर एमाले अध्यक्षका लागि शरण र मक्करको भीडन्त पक्का

भोजपुर । नेकपा एमाले भोजपुरको नयाँ नेतृत्वका लागि सहमतिको संभावना लगभग टुंगिएको छ । शुक्रबारदेखि जारी आठौं जिल्ला अधिवेशनमा सहमतिमा नेतृत्व टुंगो लगाउन सकस परेपछि चुनावबाट नेतृत्व चयन हुने भएको हो ।

जिल्ला निर्वाचन कमिटीले निर्वाचन कार्यक्रमको सूचनासमेत प्रकाशित गरिरसकेको छ । निर्वाचन तालिकाअनुसार आज अपराह्न ४ बजेदेखि साढे ६ बजेसम्म विभिन्न चरणमा मतदाता नामावली, दाबी-विरोध, छानविन र अन्तिम नामावली प्रकाशन गरिनेछ । भोलि (आइतबार) बिहान ८ बजेदेखि अपरान्ह ४ बजेसम्म मनोनयनदेखि विभिन्न चरण पार गरेर उम्मेदवारको अन्तिम नामावली प्रकाशनको समय निर्धारण गरिएको छ ।

यो पनि पढ्नुहोस् : भोजपुर एमाले नेतृत्वका लागि भोटिङ हुने सम्भावना, को-को छन् दाबेदार ?

मतदान भोलि (आइतबार) अपराह्न ४ देखि ८ बजेसम्मलाई निर्धारण गरिएको प्रमुख निर्वाचन अधिकृत भुलानाथ राईले जानकारी दिए ।

जिल्ला कमिटी अध्यक्षमा शरणकुमार राई र मक्कर खड्का प्रमुख दाबेदार छन् । भोट माग्दै उनीहरूको प्रचारप्रसार सुरू भइसकेको छ । वर्तमान अध्यक्ष प्रेमकुमार राई अहिलेसम्म मौन छन् ।

अहिलेसम्म चर्चामा आएका आकांक्षीमा उपाध्यक्षमा सिर्जना राई, धुर्व राई, ज्ञानेन्द्र कार्की, धर्म किराती, विष्णु राउत, टीका विष्ट लगायत छन् । त्यस्तै ईन्द्र थापा, मेरिका राई, रमा राई, जगत चौहान, किरण राई सचिवको आकांक्षीमा देखिएका छन् । मेरिका षडानन्द नगरपालिकाकी उपमेयर हुन् भने किरण पौवादुङ्मा गाउँपालिका प्रमुख हुन् ।

उपसचिवमा एक्सन राई, जीवन राई, बहादुर राई, शिव सापकोटा, दीपक तामाङलगायतको दाबी छ ।

भोजपुरमा करिब १३ सय प्रतिनिधिबीचबाट ९० सदस्यीय जिल्ला कमिटी बन्नेछ ।

हेर्नुस् निर्वाचन समितिले प्रकाशित गरेको निर्वाचन कार्यक्रमको सूचना :