विदेशी फिल्म जुधाइएपछि ‘चपली हाइट ३’ रिलिज पोस्टपोन्ड

काठमाडौं । हलिउडको ‘स्पाइडरम्यान : नो वे होम’ र दक्षिण भारतको ‘पुष्पा : द राइज’ एउटै मितिमा आउने भएपछि ‘चपली हाइट ३’ले पूर्वनिर्धारित शुक्रबारको प्रदर्शन स्थगित गरेको छ ।

निर्माण कम्पनी अर्जुन कुमार फिल्मसले विज्ञप्ति जारी गर्दै पुस १५ गतेलाई फिल्मको नयाँ प्रदर्शन मिति तय गरिएको जनाएको छ । विविध कारण पुस २ गतेको पूर्वनिर्धारित मिति स्थगित भएको उल्लेख छ ।

प्रचारप्रसारको बाबजुद पनि फिल्म रिलिज पोस्टपोन्ड गर्नुपरेकोमा निर्माता अर्जुन कुमारले असन्तुष्टि व्यक्त गरेका छन् । कोरोना महामारीले थलिएको नेपाली फिल्म बजारलाई चलायमान बनाउन आफूले रिलिज गर्न लागेपनि विदेशी फिल्म जुधाइएको आरोप उनको छ ।

गत महिना बसेको चलचित्र संघ र चलचित्र निर्माता संघको कार्यदल समिति बैठकले फिल्म जुधाउन नपाइने निर्णय गरेको थियो । तर, निर्णयको एक महिना नबित्दै निर्णयको उल्लंघन भएको छ । कार्यदल संयोजक अशोक शर्माले यसबारे प्रतिक्रिया दिन मानेनन् ।

स्वस्तिमा खड्काको मुख्य भूमिका रहेको चपली हाइट ३ यसअघिका दुई हिट फिल्मको सिक्वेल हो । यो मर्डर थ्रीलर फिल्ममा अर्पण थापा, सुपुष्पा भट्ट, महेश त्रिपाठी, दीपाश्री निरौलाको पनि अभिनय छ ।