मोतिपुरको झडपस्थलमा भेटिए दर्जनौं पेट्रोल बम

रूपन्देही । रूपन्देहीको मोतिपुर औद्योगिक क्षेत्रमा आइतबार झडप भएको स्थानबाट प्रहरीले ठूलो संख्यामा पेट्रोल बम फेला पारेको छ । झडपका क्रममा आन्दोलनकारीले दर्जनौं प्रहरीलाई पेट्रोलबम हानेर घाइते बनाएका थिए ।

घटनापछि उक्त क्षेत्रमा खोजी गर्दा सशस्त्र प्रहरीले पेट्रोल बम फेला पारेको हो । घटनापछि खोजतलासका क्रममा बियर र मदिराका बोतलमा पेट्रोल, सिसा र फलामका टुक्रा भरेको अवस्थामा फेला परेको सशस्त्र प्रहरीले बताएको छ । के–कति परिणाममा बरामद गरिएको हो भन्ने यकिन हुन अझै केही समय लाग्ने प्रहरीको भनाइ छ ।

‘बरामद भएको परिमाण र को–को व्यक्ति यसमा संलग्न छन् भन्ने अनुसन्धानपछि सार्वजनिक गरिन्छ,’ सशस्त्र प्रहरी स्रोतले भन्यो ।

आइतबारको झडपमा प्रहरीको गोली लागेर ४ जनाको मृत्यु भएको थियो । झडपपछि स्थिति नियन्त्रणमा लिन आइतवार साँझदेखि कर्फ्यु जारी गरेको रुपन्देही प्रशासनले आजदेखि कर्फ्यु हटाएको छ । निषेधाज्ञा भने जारी रहेको छ ।