केवल टिभी व्यवसायीको राष्ट्रिय भेला सुरू, घर-घरमा टेलिभिजन बन्द हुने अध्यक्ष शर्माको चेतावनी (भिडिओ)

काठमाडौं । देशभरका केवल टेलिभिजन व्यवसायीहरूको राष्ट्रिय भेला काठमाडौंमा सुरू भएको छ । केवल टेलिभिजन व्यवसायी महासंघको आयोजनामा भएको भेलामा ४ सय भन्दा बढी व्यवसायी सहभागी छन् ।

ऊर्जामन्त्री पम्फा भुसालले उद्घाटन गरेको भेलालाई सम्बोधन गर्दै महासंघका अध्यक्ष ध्रुव शर्माले सरकारको नीति र निर्णयले गर्दा केवल व्यवसाय समाप्त हुन लागेकाले गुहार माग्न भेला गरिएको बताए ।

शर्माले विद्युत प्राधिकरणको पोल प्रयोग नगरी घर-घरमा टेलिभिजन नपुग्ने भन्दै प्राधिकरणले ३५० प्रतिशत पोल भाडा वृद्धि गरेर सूचनाको हक खोस्न लागेको बताए । शर्माले प्राधिकरणले तोकेको शुल्क व्यवसायीले तिर्न नसक्ने र तार काटिएमा घर-घरमा टेलिभिजन प्रसारण नहुने चेतावनी दिए ।

अध्यक्ष शर्माले भने, ‘यो गम्भीर विषय हो । हामी २५/३० वर्षदेखि यो व्यवसायमा छौं र तीनदेखि ४ सय रूपैयाँमा घर-घरमा टिभी प्रसारण गरिरहेका छौं । अब बढाएको पोल भाडा हामी तिर्न सक्दैनौं र प्राधिकरणले तार काट्यो भने जनताको सूचनाको हक खोसिनेछ ।’

शर्माले आईपीटीहरूबाट अवैधरूपमा डाउनलिंकहरूमार्फत प्रसारण गर्ने, ओटीटी एपहरूबाट निर्वाधरूपमा टेलिभिजन कन्टेन्टहरू प्रसारण हुँदा राज्यलाई राजस्वमा क्षति भएको बताए ।