अब्दुल्लाह भन्छन्- भारतसँगको मैत्रीपूर्ण खेल साफ च्याम्पियनसिपको राम्रो तयारी

काठमाडौं । नेपाली राष्ट्रिय पुरुष फुटबल टोलीका मुख्य प्रशिक्षक अब्दुल्लाह अल्मुताइरीले भारतविरुद्ध हुने दुई मैत्रीपूर्ण खेल साफ च्याम्पियनसिपका लागि राम्रो तयारी हुने बताएका छन् ।

अक्टोबर १ देखि माल्दिभ्समा हुने साफ च्याम्पियनसिपका लागि अहिले राष्ट्रिय टोली पोखरामा प्रशिक्षण गरिरहेको छ । सोही क्रममा प्रशिक्षक अब्दुल्लाहले अखिल नेपाल फुटबल (एन्फा) मिडियासँग कुरा गर्दै भारतविरुद्ध आगामी १७ र २० गते हुने खेल फाइदाजनक हुने बताएका हुन् ।

साफ च्याम्पियनसिपको उद्‍घाटन खेलमा नेपाल र आयोजक माल्दिभ्स भिड्ने

‘भारतविरुद्धक दुई खेल साफ कपको तयारीका लागि फाइदाजनक छन्,’ उनले भने, ‘विश्वकप छनोट खेलेको टोलीमा धेरै परिवर्तन हुन सक्छ । किनभने, मैले खेलाडीहरूसँग धेरै समय बिताउने मौका पाएँ । हामीले धेरै क्लास गरेका छौं ।’

नेपालले घरेलु मैदानमा भदौ १७ र २० गते भारतसँग खेल्दै छ । साफ च्याम्पियनसिपको उद्‍घाटन खेलमा नेपालले अक्टोबर १ मा आयोजक माल्दिभ्सको सामना गर्नेछ ।

‘नेपालले च्याम्पियनसिपको पहिलो खेलमा माल्दिभ्ससँग खेल्ने छ,’ प्रशिक्षक अब्दुल्लाहले भने, ‘त्यो ठूलो खेल हुनेछ । किनभने, माल्दिभ्स साविक विजेता र आयोजक राष्ट्र पनि हो ।’

राष्ट्रिय टोलीका खेलाडीहरूलाई प्रशिक्षक एएफसी डी लाइसेन्सका लागि पनि तयार गरिरहेको उनले बताए । राष्ट्रिय टोलीका खेलाडीसँग ए लाइसेन्स हुनुपर्ने र त्यसले रिटायरमेन्टपछि फुटबल बुझ्न अझै सजिलो हुने बताए ।