साफ च्याम्पियनसिपको उद्‍घाटन खेलमा नेपाल र आयोजक माल्दिभ्स भिड्ने

काठमाडौं । नेपाली राष्ट्रिय फुटबल टोलीले अक्टोबरमा माल्दिभ्समा हुने साफ च्याम्पियनसिपको पहिलो खेलमा आयोजकसँग खेल्ने भएको छ । अखिल नेपाल फुटबल संघ (एन्फा)ले दिएको जानकारी अनुसार अक्टोबर १ मा प्रतियोगिताको उद्‍घाटन खेलमै नेपाल र माल्दिभ्स भिड्ने छन् ।

माल्दिभ्सको मालेस्थित राष्ट्रिय रंगशालामा हुने प्रतियोगिताको दोस्रो खेलमा नेपालले श्रीलङ्कासँग अक्टोबर ३ मा खेल्नेछ । यस्तै तेस्रो खेलमा नेपालले अक्टोबर ८ मा भारतको सामना गर्नेछ ।

प्रतियोगिताका सबै खेल राष्ट्रिय रंगशालामा हुनेछन् भने फाइनल अक्टोबर १० तारिखमा हुनेछ ।

प्रतियोगिताको तयारीका लागि नेपाली टोली अहिले बन्द प्रशिक्षणमा छ । नेपाल अहिलेसम्म प्रतियोगिताको फाइनलसम्म पुग्न सकेको छैन ।

प्रतियोगितामा नेपाल, बंगलादेश, भारत, श्रीलंका र माल्दिभ्स गरी पाँच टोलीले प्रतियोगितामा सहभागिता जनाउनेछन् ।

सात पटकको च्याम्पियन भारत प्रतियोगिताको सबैभन्दा सफल टोली हो ।

यद्यपि, नेपाली राष्ट्रिय टोलीका मुख्य प्रशिक्षक अब्दुल्लाह अल्मुताइरीले यसपटक इतिहास बनाउने दाबी गर्दै आएका छन् ।