दीपिका र दीवाकरले शुभारम्भ गरे बुटिक

काठमाडौं । नायिका दीपिका प्रसाँई र निर्देशक दिवाकर भट्टराई बुटिक उद्घाटन गर्न धनगढी पुगेका छन् । शनिबारदेखि धनगढीमा संचालनमा आएको ‘श्री कलेक्शन प्रिमियम बुटिक’को दीपिका र दिवाकरले उद्घाटन गरेका हुन् ।

बुटिकको उद्घाटन गर्दै दीपिकाले भनिन्- ‘आफू जन्मिएको ठाउँमा यति ठूलो बुटिक संचालनमा आएकोमा निकै खुशी लागेको छ । बुटिकले सफलता पाउनेछ भन्नेमा विश्वस्त छु ।’ कविता शिवाकोटीले यो बुटिक संचालनमा ल्याएकी हुन् । सिवाकोटीले ७० लाखको लगानीमा बुटिक संचालनमा ल्याएको जानकारी दिइन् ।

दीपिकाले पछिल्लो समय कलाकारहरु मात्र नभएर आम मानिसहरु पनि बुटिकका पहिरनमा आकर्षित भएको भन्दै धनगढीकै भव्य बुटिकको रुपमा संचालनमा आएको श्री कलेक्शनले आम मानिसको चाहना पुरा गर्ने आशा व्यक्त गरिन् ।

दीपिका र दिवाकरले गत महीना ललितपुरमा एक सहकारी व्यवसाय संचालनमा ल्याएका थिए । यो दम्पत्ति पछिल्लो समय फिल्म निर्माणसँगै अन्य पेशा व्यवसायमा पनि सक्रिय हुन थालेको छ ।