अब उप्रान्त धरहरा ढल्दैन : प्रधानमन्त्री (भिडियो)

काठमाडौं । प्रधानमन्त्री केपी शर्मा ओलीले नवनिर्मित धरहरा अब कहिल्यै नढल्ने दाबी गरेका छन् । यसको संरचना आफ्नै अवधारणाअनुसार डिजाइन भएको पनि उनले बताए ।

नवनिर्मित धरहराको उद्घाटन गर्दै ओलीले भने, ‘अब उप्रान्त धरहरा ढल्दैन । त्यो सुनिश्चितता गरेका छौं । अन्तिमपटक २०७२ सालमा धरहरा ढल्यो । त्यसबाट भएको क्षतिप्रति हामी संवेदनशील छौं ।’

ओलीले आफ्नो अवधारणा अनुसार धरहरा बनेको र यसको संरचना मजबुत रहेको बताए । ‘इतिहास झल्किने र आधुनिकता टल्किने’ गरी यसको निर्माण गरिएको प्रष्ट पारे ।

ओलीले भने, ‘धरहरामा पार्किङ स्थल लगायतका अन्य संरचना र पुरानो भग्नावशेषलाई संरक्षण गर्नेबारे मैले एकखालको अवधारणा दिएको थिएँ । त्यही अनुसार पुरातत्व विभाग लगायतका डिजाइनरले ती कुराहरुलाई ध्यानमा राखेकोमा म धन्यवाद दिन चाहन्छु ।’

धरहरा उक्लिँदा आफूलाई आइफेल टावर चढ्दाको स्मरण भएको प्रधानमन्त्रीले बताए ।

‘माथि चढ्दा उधुम हावा चल्छ । जति गर्मीमा पनि त्यहाँको हावाले बेग्लै आनन्द दिने गरी निर्माण भएको छ,’ ओलीले भने ।

धरहरा निर्माणमा योगदान पुर्याउने सबैलाई उनले धन्यवाद दिएका छन् ।

प्रतिक्रिया

Leave a Reply

Your email address will not be published. Required fields are marked *