तत्काल ओलीसँग एकता असम्भव : प्रचण्ड

काठमाडौं । विभाजित नेकपाका अध्यक्ष पुष्पकमल दाहाल ‘प्रचण्ड’ले प्रधानमन्त्री तथा नेकपा अध्यक्ष केपी ओलीसँगको एकता सम्भावना नरहेको प्रष्ट पारेका छन् ।

पुस ५ गते प्रधानमन्त्री ओलीले प्रतिनिधिसभा विघटन गरेपछि सत्तारुढ नेकपा विभाजनाको अवस्थामा पुगेको छ र दुवै पक्ष एकअर्कालाई खुइल्याउनमा व्यस्त छन् ।

आज बिहान सम्पादकहरुसँगको अन्तक्र्रियाका क्रममा नेकपाको एउटा समूहको नेतृत्व गरिरहेका प्रचण्डले भने, ‘ओलीले प्रतिनिधिसभा विघटनप्रति आत्मआलोचना वा गल्ती स्वीकार गर्ने अवस्था देखिन्न । ५/७ वर्षपछि के हुन्छ भन्न सकिन्न तर तत्कालका लागि पुनः एकता सम्भव छैन ।’

प्रचण्डले केपी ओलीलाई बेलैमा सहमति पालना गराउन र विधि पद्धतिमा हिँडाउन नसक्नु आफूहरुको कमजोरी भएको भन्दै त्यसप्रति आत्मआलोचना गरेका छन् ।

‘हुँदा हुँदा उहाँ त कुर्सी भाँच्नेतर्फ नै जानुभयो,’ अन्तरक्रियामा प्रचण्डले भनेका छन् ।