प्रधानमन्त्रीलाई भेटेर शिवले दिए फिल्म हेर्न निम्तो, ओलीले भने –समय मिलाएर आउँछु

सरकारले हल खोल्ने अनुमति नदिएपछि निर्माता एवं अभिनेता शिव श्रेष्ठलाई माघ १ गते घोषित फिल्म ‘एउटा यस्तो प्रेम कहानी’ रिलिज गर्ने वा नगर्ने दोधार थियो । यसका लागि उनले आइतबार प्रधानमन्त्री केपी शर्मा ओलीलाई पनि भेटे । तर, सोही दिन बसेको मन्त्रिपरिषद् बैठकले हल संचालनलाई सर्तसहित फुकुवा गर्ने निर्णय गरेको छ । यो निर्णयपछि श्रेष्ठ ढुक्कको साथ फिल्म रिलिज गर्न पाइने कुराले खुशि छन् ।

प्रधानमन्त्रीसँगको भेटमा श्रेष्ठले हल फुकुवा गर्नुपर्ने र थलिएको फिल्म क्षेत्रलाई उकास्न सरकारी भूमिकाको अपेक्षा गरिएको बताएको थिए । नेपाल प्रेससँग कुरा गर्दै श्रेष्ठले प्रधानमन्त्री ओली फिल्म क्षेत्रलाई लिएर गम्भिर भएको आफूले महसुस गरेको बताए । सोही भेटमा श्रेष्ठले आफ्नो फिल्म हेर्न आउन ओलीलाई निम्तो समेत दिएका छन् । जवाफमा प्रधानमन्त्रीले समय मिलाएर आउने वचन दिए ।

प्रधानमन्त्री र मन्त्रीलाई फिल्म देखाउन शिवले प्रिमियर समेत आयोजना गरेका छन् । सरकारले बाटो खुला गरिदिएपछि अब भने शिवलाई दर्शक आउने हुन् वा होइनन् भन्ने चुनौति थपिएको छ । किनभने, फिल्म हल बन्द भएको १० महिना बितिसक्यो र ५० प्रतिशत अकुपेन्सीमा मात्र फिल्म देखाउन पाइने सरकारी निर्देशन छ । व्यवसायीले पुस १० गतेदेखि एकपक्षीय रुपमा हल खोलेपनि दर्शकीय अकुपेन्सी करिब जिरो नै थियो ।

मन्त्रिपरिषद्ले नै निर्णय गरेपछि भने अब निर्मातालाई ढुक्कसाथ फिल्म छायांकन गर्न र प्रदर्शकलाई फिल्म देखाउन सजिलो भएको छ । नेपाल प्रेससँग कुरा गर्दै वितरक गोपाल कायस्थले सरकारी निर्णयपछि अब फिल्मले रिलिज डेट घोषणा गर्ने बताए ।