राजेन्द्र लिङदेनको विश्लेषण- नेपालको शक्ति राष्ट्रहरूको प्रतिस्पर्धास्थल बन्दैछ

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले नेपाल शक्ति राष्ट्रहरुको प्रतिस्पर्धास्थलको रुपमा परिणत हुने जोखिम रहेको बताएका छन् ।

राप्रपाद्वारा मंगलबार आयोजित ‘नेपालको परराष्ट्र नीति, विगत, वर्तमान र भविष्य’ विषयक विचार गोष्ठीलाई सम्बोधन गर्दै उनले नेपालले शक्ति राष्ट्रहरुको बारेमा ठोस धारणा बनाउनुपर्ने बताए ।

लिङदेनले भने, ‘अहिले हामी सामान्य अवस्थामा छैनौं । सत्तारुढ पार्टीहरुको विदेश सम्बन्ध नै सत्ता केन्द्रितमात्रै हो । सत्ताको लागि जे पनि समर्थन गर्ने, विदेशीसँगको साथ समर्थन भएन भने चुनाव जित्न सकिँदैन, चुनाव जितियो भने पनि सरकारमा जान सकिँदैन र सरकारमा पुगियो भने पनि टिक्न सकिँदैन भन्ने मान्यता छ । त्योअनुसारको क्रियाकलाप छ । नेपाल अहिले शक्ति राष्ट्रहरुको प्रतिस्पर्धास्थलको रुपमा परिणत हुँदैछ । हाम्रो सत्ता पक्षको कमजोरीको कारणले त्यो प्रतिस्पर्धाको शिकार नेपाल बन्ने खतरा छ ।’

अहिले नेपालको परराष्ट्र नीति नै नभएको उनले दाबी गरे । लिङदेनले थपे, ‘सरकारले देशहरुसँग गरिराखेको सम्बन्ध त आफ्नो सत्ता कसरी टिकाउने भन्नेमा केन्द्रित छ । एउटा देशसँग लिने सहयोग पनि कमिसनसँग पार्टीको व्यक्तिको लाभसँग लिने भएपछि त्यो देशसँगको सम्बन्ध कस्तो हुन्छ होला ? त्यो देशले हेर्ने दृष्टिकोण कस्तो हुन्छ होला ?’