राजेन्द्र लिङदेनले गरे ८९औं पटक रक्तदान

काठमाडौं । राप्रपा अध्यक्ष राजेन्द्र लिङदेनले ८९ औं पटक रक्तदान गरेका छन् । पार्टी सम्बद्ध राष्ट्रिय प्रजातान्त्रिक युवा संगठन उपत्यका विशेष कमिटीद्वारा शनिबार आयोजित कार्यक्रममा अध्यक्ष लिङदेनले ८९ औं पटक रक्तदान गरेका हुन् ।

उनले हरेक तीन महिनामा रक्तदान गर्ने गरेका छन् । अध्यक्ष लिङदेनले कोरोनापछि चिकित्सकको सल्लाहअनुसार आफूले रक्तदान गर्न थालेको बताउँदै आजसम्म गरेर ८९ औं पटक भएको बताए ।

उनले बिरामीलाई रगतको अभाव हुन नदिन रक्तदानलाई निरन्तरता दिनुपर्ने र राप्रपाको युवा संगठनले समय समयमा यस्तो कार्य गर्ने गरेकोमा प्रशंसासमेत गरे ।

दलको भ्रातृ संगठनले दलीय गतिविधिमा मात्रै होइन, सिर्जनशील र रचनात्मक कार्यमा सहभागी हॅुदै सामाजिक दायित्व निर्वाह गर्नुपर्ने उनको भनाइ थियो ।

कार्यक्रममा ६३ जनाले रक्तदान गरेको संगठनको उपत्यका विशेष कमिटीका अध्यक्ष सञ्जय कार्कीले जानकारी दिए ।