पार्टीको सांसद सहकारीको रकम अपचलनमा जोडिएको विषयको निष्पक्ष छानबिन गर्न राप्रपाको माग

काठमाडौं । राप्रपाले प्रतिनिधिसभा सदस्य गीता बस्नेतको कम्पनीबाट सहकारीको रकम अपचलन भएको भन्ने विषयको छानबिन गर्न माग गरेको छ । पार्टीकी सांसद सहकारीको रकम अपचलनको बिषयमा जोडिएपछि पार्टीको केन्द्रीय कार्यसम्पादन समितिको बैठकले छानबिन गर्न माग गरेको प्रवक्ता मोहन श्रेष्ठले बताए ।

उनले भने, ‘सञ्चारमाध्यममा सार्वजनिक भएकोमा सो सम्बन्धी छानबिनमा सघाउ पुर्याउन निजलाई निर्देशन दिइयो । साथै, उक्त घटनाका विषयमा नेपाल सरकारको जिम्मेवार निकायबाट निष्पक्ष छानबिन गर्न र सहकारीको रकम अपचलन सम्बन्धी त्यस्तै प्रकारका घटनामा संलग्न अन्य व्यक्तिहरुमाथि पनि स्वतन्त्र छानबिन गर्न राप्रपा सरकारसँग माग गर्दछ ।’

बैठकले उपनिर्वाचनको उपनिर्वाचनको परिणाम पार्टीका लागि अनपेक्षित हुन पुगेको निष्कर्ष निकालेको छ । निर्वाचनको परिणाम पार्टीको पक्षमा नहुनुमा कमजोर संगठन प्रमुख कारण रहेकाले आगामी दिनमा संगठन सुदृढीकरण अभियान सन्चालन गर्ने निर्णय गरेको उनले बताए ।

आन्दोलन र निर्वाचन दुवैका लागि संगठन आधारभूत विषय भएकाले आगामी दिनमा पार्टीलाई थप जागरुक र क्रियाशील बनाउन ४० बुँदे माग, पार्टीको नीति, विचार सिद्धान्त र जनजीविकाका विषयलाई आन्दोलनकै रुप दिइ आवश्यकता अनुसार कार्यक्रम तय गर्न र आ–आफ्नो क्षेत्रमा संगठन सुदृढीकरणको अभियान सन्चालन गर्न सबै प्रदेश र जिल्ला कार्यसमितिलाई निर्देश गरेको बताए ।