संक्रमणकालीन न्यायसम्बन्धी विधेयक संसदमा लैजाने नाै दलकाे निर्णय, सत्ता बाँडफाँट राष्ट्रपति निर्वाचनपछि

काठमाडौं । ९ दलीय गठबन्धनको बैठकले संक्रमणकालीन न्यायसम्बन्धी विधेय संसदमा लैजाने निर्णय गरेको छ ।

पछिल्लो समय संविधानविपरीत गतिविधि भइरहेको भन्दै गठबन्धन बैठकमा त्यसमा ध्यानाकर्षण भएको नेपाली कांग्रेका प्रमुख सचेतक रमेश लेखकले बताएका छन् । यो व्यवस्था र संविधानका विरुद्धमा भइरहेका गतिविधिहरुलाई निरुत्साहित गर्नुपर्ने निर्णय भएको लेखकले जानकारी दिए । उनले दुर्गा प्रसाईंले गरेका गतिविधितर्फ संकेत गर्दै यस्तो बताए ।

संक्रमणकालीन न्यायसम्बन्धी विधेयक यसै संसदमा लगिने लेखकले बताए । पीडित परिवारलाई ध्यान दिएर कानून पनि बनाउने र आयोगहरु पनि बनाउन अघि बढ्ने निर्णय भएको उनले बताए ।

अदालतले प्रधानमन्त्रीविरुद्धको रिट दर्ता गर्न अनुमति दिएको विषयमा बैठकमा के भयो भन्ने सञ्चारकर्मीकाे प्रश्नमा उनले भने, ‘अदालतले पनि सहयोगी भूमिका निर्वाह गर्छ भन्ने हामीलाई विश्वास लागेको छ । संक्रमणकालीन विषय भनेको सबैको साझा विषय हो नि । यसमा अदालतले पनि सहयाेगी भूमिका खेल्छ भन्ने छ ।’

उनले सत्ता बाँडफाँटकाे विषय राष्ट्रपतिकाे निर्वाचनपछि छलफल हुने बताए ।