पञ्चालाई २४ घण्टे स्पष्टीकरण- पोखरा विश्वविद्यालय र सीटीईभीटीमा बार्गेनिङको कुरा के हो ?

काठमाडौं । नेकपा माओवादीनिकट विद्यार्थी संगठन अखिल क्रान्तिकारीकी अध्यक्ष पञ्चा सिंहलाई लेखा आयोग उपप्रमुख गम्भीर साउँदले स्पष्टीकरण सोधेका छन् ।

अध्यक्ष सिंहमाथि लोको आरोपको खण्डन गर्न नसकेको भन्दै शंका गर्न मिल्ने ठाउँ भएकाले प्रष्टीकरण सोधेका हुन् ।

अध्यक्ष सिंहमाथि संगठनका उपाध्यक्ष, कोषाध्यक्ष, केन्द्रीय सदस्यहरूले पोखरा विश्वविद्यालय र सीटीईभीटी मा आर्थिक बार्गेनिङ गरेको कुरा के हो ? संगठनका जिम्मेवार नेताहरूबाट सीटीईभीटी, पोखरा विश्वविद्यालयलगायत अन्य विश्वविद्यालयमा सम्बन्धन र कार्यक्रम विस्तारलाई लिएर आन्दोलनको नाममा आर्थिक लेनदेन गर्न बार्गेनिङ गरेको बिषयले संगठनको आर्थिक पारदर्शीतामाथि गम्भीर प्रश्न उठाएको आरोप लगाउँदै आएका छन् ।

साउँदले सिंहलाई सोधेको स्पष्टीकरणमा भनिएको छ, ‘तपाईँमाथि लगाएको आरोपको विषयउपर आजको दिनसम्ममा उचित जवाफ वा खण्डन आउन नसक्नुले तपाईँमाथि शंका गर्न मिल्ने ठाउँ बनेको छ ।’

कुनै पनि कमिटीमा छलफल नगरी शैक्षिक मुद्दाहरूको तय, मुद्दाहरु उठानको प्रक्रिया र सम्बधित निकायमा प्रारम्भिकरूपमा बुझ्दा केन्द्रको निर्देशनमा चलखेल भएकै बुझिन्छ भनेर जारी भएको पत्र/विज्ञप्ति/ध्यानाकर्षण (सार्वजनिक भएको दुई पत्र) उपर तपाईँ को धारणा के हो ? भनी पञ्चामाथि प्रश्नसमेत गरिएको छ ।

कसमस कलेजमा अध्यक्ष सिंहकै निर्देशनमा समानान्तर गतिविधि गरेकोबारे प्रश्न उठाएइएको छ । उनले संगठनमाथि लागेको कालो घब्बाको बारेमा वास्तविक कुरा के हो भन्नेबारे २४ घण्टाभित्र लिखित स्पष्टीकरण पेश गर्न निर्देशन दिएका छन् ।

अध्यक्ष सिंहमाथि आरोप लाग्नुको साथै पवन कार्की समूहले देशभर समानान्तर गतिविधि गरिरहेको छ । तर, पार्टी संगठनमा विवाद छताछुल्ल भइसक्दासमेत उक्त विवाद समाधानमा माउ पार्टी नेकपा माओवादी केन्द्र मौन बसेको क्रान्तिकारी नेताले गुनासो गरिरहेका छन् ।

एक वर्षअघि २०७८ असोज १४ गतेदेखि १८ गतेसम्म अखिल क्रान्तिकारीको २२ औँ राष्ट्रिय सम्मेलनबाट विवाद सुरू भएको थियो । पार्टी अध्यक्ष पुष्पकमल दाहाल ‘प्रचण्ड’ ले अध्यक्षमा सिंहलाई अघि सारेपछि विवाद चुलिएको थियो ।