भोजपुरमा मुख्यमन्त्री राजेन्द्र राई भर्सेस हरिबहादुर : चुनावी एजेण्डा-पहिचान कि समृद्धि ? (भिडिओ) – Nepal Press
चुनाव-७९

भोजपुरमा मुख्यमन्त्री राजेन्द्र राई भर्सेस हरिबहादुर : चुनावी एजेण्डा-पहिचान कि समृद्धि ? (भिडिओ)

काठमाडौं । भोजपुरका अजम्बर राई काङमाङले १० वर्षअघि अशोक राईहरूसँगै एमालेबाट विद्रोह गरे । लगत्तै भोजपुरकै अर्का एमाले नेता राजेन्द्रकुमार राईले सामाजिक सञ्जालमा लेखे- वर्गीय मुक्तिको झण्डा बोक्न यो राजेन्द्र राई मैदानमा खडा छ ।

वर्गीय मुक्ति र जातीय मुक्तिका दुई योद्धाको रूपमा यी दुई नेता २०७४ को चुनाव चुनावी मैदानमा भोजपुर प्रदेशसभा १ मा आमने-सामने भिडे । एमाले-माओवादी गठबन्धनका साझा उम्मेदवार राजेन्द्र कांग्रेस-संघीय गठबन्धनका उम्मेदवार अजम्बरलाई ७ हजार ७ सय ५६ मतले पछि पार्दै विजयी भएका थिए ।

राजेन्द्रले १९ हजार २ सय ९७ मत ल्याएका थिए भने अजम्बरले ११ हजार ५ सय ४१ मत प्राप्त गरे ।

विद्यार्थी राजनीतिकै क्रममा काठमाडौंमा केन्द्रित भएका उनले ‘ग्रासरुट’ पोलिटिक्स भने यही चुनावबाट थालेका हुन् । पहिलोपटक चुनाव लडेका राईको यो जितसँगै संसदीय यात्रा सुरू भएको थियो ।

अहिले सत्ता गठबन्धनबाट भोजपुर प्रदेशसभा १ मा पुन: होमिएका छन् राजेन्द्र । अजम्बर माओवादीमा फर्किएर उनलाई जिताउन खटिएका छन् ।

राजेन्द्रविरुद्ध एमालेले केन्द्रीय सदस्य हरिबहादुर राईलाई मैदानमा उतारेको छ । एमालेमा रहँदा दुवै नेता एउटै कित्तामा रहेपनि पार्टी फुटाउने माधव नेपालको निर्णयलाई हरिलगायतका जिल्लाका प्रभावशाली नेताले साथ दिएनन् । त्यसैले जिल्लामा नेकपा एसको अवस्था सोचेजस्तो बलियो हुन सकेन । एमालेमै बसेका शरणकुमार राईले जिल्लाकै नेतृत्व सम्हाल्ने अवसर पाए । ७७ जिल्लामा १०बुँदेबाट आएका २ जना अध्यक्षमध्ये शरण एकजना हुन् ।

अहिले परिस्थितिले हरि र राजेन्द्रलाई प्रतिस्पर्धीको रूपमा खडा गरेको छ । मुख्यमन्त्री राजेन्द्रसँग हिजोका सारथि हरिको मंसिर ४ को भिडन्त १ नम्बर प्रदेशकै सम्भवतः सबैभन्दा रोचक बन्नेछ । त्यसैले यसपटक भोजपुरको प्रदेशसभा १ निर्वाचन क्षेत्र चर्चामा छ ।

अहिले दुवैजना भोट माग्दै मतदाताको घरदैलोमा हिँडिरहेका छन् । लामो समय एउटै पार्टीको राजनीति गरेका राजेन्द्र र हरिको बाटो फेरिएको १४ महिनापछि चुनावी बाटोमा जम्काभेट भएको छ । दुईमध्ये कसले जित्लान् भोजपुर प्रदेशसभा १ को चुनाव ? अहिले चासोको विषय बनेको छ भोजपुरमा ।

भोजपुरमा कतिपय यी दुई नेताका साझा शुभेच्छुक पनि छन् । तर, राजनीतिमा व्यक्तिभन्दा पार्टीले चाहेर निर्णय हुन्छ । यी दुई भिड्नैपर्ने भयो । अब ती शुभेच्छुकले पनि राजेन्द्र वा हरिमध्ये एक रोज्नुपर्ने बाध्यता आइलागेको छ ।

भोजपुर १ आजसम्म वामपन्थीले कहिल्यै नहारेको क्षेत्र हो । २०४८ देखिका हरेक निर्वाचनमा एमालेले जित्दै आएको यस क्षेत्रमा ६४ मा माओवादीले जित्यो । यो क्षेत्रबाट तीनपटक पराजित भएका कांग्रेस नेता ज्ञानेन्द्रबहादुर कार्की ‘आजित’ भएर ७४ बाट सुनसरी झरिसकेका छन् ।

संघमा माओवादीका सुदन किराती र प्रदेश २ मा कांग्रेसका विनोद बान्तवालाई साथमा लिएर मुख्यमन्त्री राई लडाइँमा छन् । सुरूमा भागबण्डाप्रति असन्तुष्टि जनाउँदै कांग्रेस नेता उत्तम चापागाईँले बागी उम्मेदवारी दिएपछि राजेन्द्रलाई चुनौती खडा भयो । अझैपनि आफूहरूको भोट ‘मानामा पाथी’ घोप्ट्याए जसरी हाल्नुपर्ने भन्दै कांग्रेसीहरूको असन्तुष्टि सुनिन्छ । चापागाईँले उम्मेदवारी फिर्ता त लिएनन्, तर, पार्टी निर्णयबाहिर जान नसकिने भन्दै ४ दिनअघि निष्क्रिय पारेको घोषणा गरेका छन् । बागी उम्मेदवारी निष्क्रियले राहतको सास फेरेका राजेन्द्रले चापागाईँको विज्ञप्ति राख्दै फेसबुकमा लेखे- धन्यवाद मित्र !

यस्तो छ- दुई राईको राजनीतिक यात्रा

चुनावी आँकलन गर्नुअघि राजेन्द्र र हरिको राजनीतिक यात्राबारे चर्चा गर्नु आवश्यक छ । यी दुवैको राजनीति ४० को सुरूवाति दशकतिरबाट भएको हो । यहाँ दुवै नेताको राजनीतिक जीवन प्रस्तुत गरिएको छ ।

हक्की नेता, चट्टानी अडान

२०२७ असार १५ गते बुबा नगेन्द्रबहादुर राई र आमा धनकुमारी राईको चारमध्ये कान्छो सन्तानाको रूपमा राजेन्द्र भोजपुरको साविक किमालुङ गाविसको सुर्केमा जन्मिएका हुन् । त्यहाँबाट छिमेकी गाविस देउरालीमा बसाइँ आएका उनको घर अहिले षडानन्द नगरपालिका-१० झ्याउँपोखरीमा छ ।

स्वकीय सचिव सन्दीप राईका अनुसार १८ वर्षअघि शोभा पाठकसँग वैवाहिक बन्धनमा बाँधिएका राईले झ्याउँपोखरीकै शारदा माविबाट एसएलसी गरे । प्रमाणपत्र तह र स्तातक तह भने काठमाडौंको आरआर क्याम्पसबाट पूरा गरे ।

२०४३ सालतिर काठमाडौं छिरेका उनी आरआर क्याम्पसको स्ववियू सदस्य हुँदै २०४९ मा सभापति निर्वाचित भए । विद्यार्थी संगठनबाट मुलधारको राजनीतिमा आएका राईले अनेरास्ववियूमा २ दशकबढी बिताए । गाउँमै मावि पढ्दा अनेरास्ववियूका प्रारम्भिक कमिटी हुँदै उनी केन्द्रीय अध्यक्षसम्म भए । २०५७-२०५९ र २०५९-२०६१ मा राजेन्द्र अनेरास्ववियूको नेतृत्वमा रहे ।

एमाले नवौँ महाधिवेशनमा उनी केन्द्रीय सदस्यमा निर्वाचित भए । नेकपाकालमा केन्द्रीय सदस्य तथा संखुवासभा इन्चार्जको जिम्मेवारीमा रहे ।

माधव नेपाल प्रधानमन्त्री हुँदा राई जनसम्पर्क सल्लाहकार भएका थिए । एमालेबाट विभाजित भएर बनेको नयाँ पार्टी नेकपा एसमा हाल उनी केन्द्रीय सचिवको जिम्मेवारीमा छन् ।

जनआन्दोलनकालमा नारायणहिटीबाट छोटो दूरीमा रहेको रत्नपार्कनजिकैको ‘रातोघर’ चर्चामा थियो । त्यहीँ आन्दोलनको रणनीति बनाउँदै राजेन्द्रको नेतृत्वमा सडकमा राजतन्त्रविरोधी नारा घन्किन्थ्यो । गणतन्त्रको नारा लगाएकै कारण राजद्रोहको अभियोगमा राजेन्द्र ३ महिनाभन्दा बढी जेल परे ।

जनआन्दोलनमा सडकमा गणतन्त्रको नारा लगाएर ‘हक्की’ देखिएका उनी युवामाझ पनि लोकप्रिय बने ।

एमालेमै छँदादेखि राईलाई हक्की र आफ्नो अडानभन्दा दायाँबायाँ नचल्ने नेताका रूपमा लिइन्थ्यो । उनी र अध्यक्ष केपी शर्मा ओलीसँगको सम्बन्ध प्रायः सधैँ ३६/६३ को आँकडा जस्तै बन्यो । केपी ओलीलाई अध्यक्ष बनाउने नवौं महाधिवेशनको हलमा राईले ओलीविरुद्ध लेखेको पुस्तक बाँडिएपछि केहीबेर महाधिवेशन नै अवरुद्ध भएको थियो ।

एमाले-माओवादी एकीकरणपछि बसेको नेकपाको केन्द्रीय कमिटी बैठकस्थलमा ओली र प्रचण्डको फोटो टाँगिएको विषय राईले उठाएपछि बैठक हलबाट फोटो हटाइएको थियो । राई सैद्धान्तिक, वैचारिक कुरामा निर्ममरूपमा प्रस्तुत हुने गर्छन् ।

अशोक राईले पार्टी फुटाएर संघीय समाजवादी खोलेपछि नेकपा एमालेले जनजाति नेताहरूलाई केन्द्रीय सदस्यमा मनोनीत गरेको थियो । सुरूमा उनले त्यो मनोनयन अस्वीकार गरेका थिए ।

वैचारिक राजनीतिक विषयमा प्रष्ट नभइ एकता गरिएको भन्दै एमाले-माओवादी एकताको समेत आलोचक बनेका थिए उनी । सर्वोच्च अदालतले नेकपा खारेज गरी एमाले ब्युँतिएपछि ओलीसँग मिसिन नहुने धारणा राख्दै आएका थिए । पार्टीको अन्तरसंघर्षमा राजेन्द्र सुरूदेखि नै माधव नेपालको पक्षमा उभिए ।

नेकपाकालमा केपी ओली र प्रचण्डबीच सुरू टकराबको पराकम्पस्वरूप अहिले केन्द्रदेखि प्रदेशसम्मका सबै सरकारमा नेकपा एमाले प्रतिपक्षी बनेको छ । पछिल्लो समयमा माधवकुमार नेपालले नयाँ पार्टी खोलेर एमाले विभाजन भएपछि प्रदेश सरकारहरू धमाधम हल्लिए ।

केन्द्रीय सत्ता गठबन्धनबीच सत्ता बाँडफाँटको सहमतिअनुसार नेकपा एसलाई प्रदेश १ पर्‍यो । त्यही समझदारीअनुसार प्रदेश १ मा अंकगणितीय हिसाबले १० सांसदसहित चौथो दलको वरीयतामा रहेको नेकपा एसले सरकारको नेतृत्व गरेको छ ।

‘हरि जेठा, इमानी नेता’

२०२६ सालमा बुबा समृदमान राई र आमा मित्रमाया राईको ६ जना छोरा र एक छोरीमध्ये हरिबहादुर राई जेठो सन्तान हुन् । भोजपुर टेम्केमैयुङ गाउँपालिका-५ खावाका उनी हाल एमालेको केन्द्रीय सदस्य एवं भोजपुर जिल्ला इन्चार्ज छन् । उनी अविवाहित छन् ।

२०३९ सालबाट विद्यार्थी राजनीति सुरू गरेका राईले २०४० सालमा अनेरास्ववियू एकता पाँचौंको सदस्यता लिएका थिए । उनी २०४२ मा अनेरास्ववियू प्रारम्भिक कमिटी, २०४७ माघमा नेकपा एमाले गाउँ कमिटीको उपसचिव भए ।

२०४९ सालमा एमाले जिल्ला कमिटी सदस्य बनेका राई २०५४ मा जिविस भोजपुरको सदस्य निर्वाचित भए । २०६५-२०६८ मा एमाले भोजपुरको उपसचिव भएका उनी १४ वर्षसम्म युवा संघको केन्द्रीय नेतृत्वमा रहे । राई एमालेको नवौं महाधिवेशनबाट वैकल्पिक सदस्यमा निर्वाचत भए ।

२०६६ सालमा युवा संघको लहान महाधिवेशनबाट केन्द्रीय उपाध्यक्ष बनेका राई युवा संघको सातौं महाधिवेशनबाट केन्द्रीय सल्लाहकार सभापति बनेका थिए । युवा संघमा रहँदा साझा अभिभावकजस्तै बनेका राई अहिले पनि देशभरीका युवाहरूले सम्मानका साथ हेर्छन् ।

राजनीतिक हिसाबले हरिबहादुर राई नेकपा (एमाले) का नेता हुन् । तर, गृहजिल्ला भोजपुरमा सबै पार्टीका साझा नेता जस्तै छन्, उनी । नम्र बोली, निर्दोषपना र विकासे एजेण्डालाई उठाइरहने हरिलाई सबैले मान्नुको कारण हो, ‘इमानदारिता र निष्ठा ।’

पञ्चायत, राजतन्त्रदेखि गणतन्त्रसम्म आइपुग्दा भोजपुरले थुप्रै सांसद, मन्त्री जन्माएको छ । हरेक क्याबिनेटको प्रभावशाली मन्त्रीमा भोजपुरका नेता प्राय छुट्दैनन् । समकालीन नेताहरूले पटक-पटक अवसर पाउँदा कुनै जिम्मेवारी नपाएका नेता हुन् हरि । निरन्तर पार्टी र आन्दोलनमा सक्रिय भएका उनी यसमा आफ्नो गुनासो नभएको सुनाउँछन् ।

उनी भन्छन्, ‘मेरो जिन्दगी नै पार्टी निर्माण र समाज परिवर्तनमा समर्पित गरेको छु । विद्यार्थी, युवा हुँदै अहिले पार्टी केन्द्रीय कमिटीमा पनि छु । यीनै अनुभवलाई संगाल्दै राजनीतिक परिवर्तन संस्थागत गर्दै विकास र समृद्धिको लागि मेरो उम्मेदवारी हो ।’

एजेण्डा पहिचान कि समृद्धि ? यस्तो छ रोचक सवाल-जवाफ

दुवै उम्मेदवार एउटै समुदाय र एकै पुस्ताका प्रभावशाली युवा नेताको भीडन्तले भोजपुर प्रदेशसभा १ आगामी चुनावी प्रतिस्पर्धाका लागि हटसिट बन्न पुगेको छ । एमाले एकपटक घनेन्द्र बस्नेत बाहेक सधैँ यहाँ जनजाति उम्मेदवार उठाइरहेको छ । कांग्रेसले प्रायः क्षेत्री उठाउँथ्यो ।

गठबन्धनमा रहेका दलहरूको मत खप्टिने कारणले राजेन्द्र राई फराकिलो मतान्तरले चुनाव जित्नेमा ढुक्क देखिन्छन् । एमाले पनि नयाँ अनुहारलाई अघि सारेको, राजेन्द्रले प्रदेशको नामाकरणमा पहिचानलाई अघि सारेकोले खस-आर्यको मत आउने आशमा छ । प्रतिनिधिसभामा सञ्चारमन्त्री तथा मुख्यमन्त्री भइसकेका शेरधन राई र प्रदेशसभा २ मा प्रेम कार्कीको उम्मेदवारीले जातीय सन्तुलन मिलाएकोले हरि राईको मत अझ बढ्ने दाबी एमाले नेताहरूको छ । सँगै असन्तुष्ट कांग्रेसी भोटलाई ‘क्यास’ गर्ने दाउमा पनि छन् उनीहरू ।

भोट माग्दै हिँडिरहेका बेला दुवै उम्मेदवारले अघि सारेका एजेण्डालाई पनि मतदाताले नियालिरहेका छन् । उनीहरूका प्रचारप्रसार भाषणमा केही एजेण्डा मुखरित भएका छन् । राजेन्द्रले पहिचानको मुद्दालाई जोडतोडको रूपमा अघि सारेका छन् भने हरिले समृद्धि, विकास र स्थिरतालाई प्राथमिकता दिइरहेका छन् ।

हेर्नुस् भिडिओ :

राजेन्द्रलाई पुन: मुख्यमन्त्री बनाउने उद्घोषसहित जिल्लाको गठबन्धन यतिखेर मैदानमा छ । अधिकांश भाषणमा उनले आफू किरात प्रदेशमा दृढ रहेको बताएका छन् । केही समयअघि उनले प्रदेशको नाम किरात नभए पदमात्र होइन राजनीति नै छाड्ने बताएका थिए । षडानन्द नगरपालिकाको दिङ्लामा केही दिनअघि गठबन्धनको चुनावी कार्यक्रममा राजेन्द्रले स्थानीय तहको नाम जातीय आधारमा राख्दा, मधेस प्रदेशको नाम राख्दा केही बिग्रिएको छ ? भनी सोधेका छन् ।

‘स्थानीय तहहहरूका नाम कतिवटा जातीय पहिचानका छन् । यहाँ रामप्रसादराई, साकेला गाउँपालिका, कुलुङ दुधकोशी, पाँचथरका त सबै पालिका नाम जातीय आधारमा राखिएको छ केही बिग्रिएको छ ? हामीले नजान्दादेखिका कति नाम छन् तिवारीभञ्ज्याङ, कार्कीगाउँ, बाहुनगाउँ, दमाई टोल, सार्की टोल अनेकौं नाम छन् । कसैले जातीवादी भनेर आक्षेप लगाउनु हुँदैन’, उनले भनेका छन्, ‘किरात जात नभएर सभ्यता हो । २५ पुस्ता सबैभन्दा बढी समय किरातीहरूले शासन गरेको सबैले स्वीकारेको कुरा हो । मैले काठमाडौंकै नाम यो नेपालकै नाम राख्छु त भनेको छैन नि । अहिले सुदूरपश्चिमको चर्चा भएको भए म त्यो प्रदेशको नाम खस राखौं भन्थेँ । त्यतिबेला मलाई खसवादी भन्नुहुन्थ्यो तपाईँले ? जातबाट च्यूत भएको भन्नुहुन्थ्यो ? ४ नम्बरको थियो भने तमुवान गण्डक भन्थेँ म । १ नम्बरको भएकोले पो किरात राखुँ भन्दैछु त ।’

एक महिनाअघि असोज ८ गते राष्ट्रियसभागृह काठमाडौंमा भएको किरात राई यायोक्खाको ११औं महाधिवेशनमा उनले कोशीको पक्षमा दुईतिहाइ सांसदहरूले प्रस्ताव दर्ता गर्न लागेको थाहा पाएपछि आफूले रोकेको बताएका थिए । यदि कोशीको प्रस्ताव दर्ता गराइए संसद नै रोकिदिने भनेर अडान लिएको उनले सुनाएका थिए ।

सभागृहमा उनले राखेको मन्तव्य यस्तो थियो-

दुईपटक पहिचान विपक्षको नाम राख्ने कुरालाई रोक्ने प्रयासमा सहभागी छु र त्यसमा सफलता प्राप्त गरेका छौं । हाम्रो उद्देश्य भनेको प्रयास पहिलो पहिचानसहितको नाम राख्ने हो । त्यो हुन सकेन भने कम्तीमा पहिचानविरोधी नाम रोक्ने नै हो । अहिले पनि संख्या जोड्दा कोशीको पक्षमा दुईतिहाइ पुगिसकेको छ । एक हिसाबले भन्ने हो भने असंवैधानिकजस्तो, मूर्खजस्तो ढंगले म प्रस्तुत भएँ । मसँग सल्लाह नगरी संसदभित्र दर्ता गर्नुभयो भने मसँग एउटा हतियार छ । संसदको हिउँदे र बर्खे अधिवेशन सरकारले रोक्नसक्छ । सरकार भनेको मुख्यमन्त्री हो । बैठक राख्न भ्याइँन भने बाटोमा घुँडामा लेखेर भए पनि यो संसद रोक्दिन्छु म । पहिचानविरोधी नाम पास गराउन दिन्न भनेर बैठक र सार्वजनिक ठाउँमा भनेँ । मेरो त्यही असहमतिका कारण प्रदेशसभामा त्यो नामको प्रस्ताव दर्ता भएन । किरातको पक्षमा नउभिनेलाई फूलबारीमा राख्ने र बलेँसीमा राख्ने कि चुलोमै राख्नुहुन्छ ? भोट पाउँछ जित्छ सांसद बन्छ, मुख्यमन्त्री बन्छ, मन्त्री पाउँदा प्रधानमन्त्रीसम्म बन्छ त्यो ठाउँमा पुगेपछि किरातविरोधी काम गर्छ भने त्यसलाई पनि चुलैमा राख्ने ? म यत्रो गाली खाईखाई किन प्रष्ट बोल्ने ? फेसबुकमा हेर्नुभो भने मैले बोलेको कुरालाई लिएर मेरो सातपुस्तालाई गाली गरिन्छ । मेरो राजनीतिक भविष्य दाउमा छ एउटा निश्चित प्रतिशतले त अब मलाई भोट हाल्दैन यो प्रष्ट छ । भोजपुरमा हिजो मलाई भोट हाल्नेहरू पनि एउटा संख्याले अब मलाई भोट हाल्दैन । पार्टीमा मेरो बोली व्यवहारप्रति प्रश्न उठिरा’को छ ।

किरात जात नभएर सभ्यता भएको उनी बताउँछन् । शासकहरूले कानून र व्यवहारबाट नै संस्कृति लोप गराएको जनजातिलाई विभाजित र विभेद गराएको बताउँछन् ।

‘समाजवादमा जाने मान्छेलाई धनी र सुखी बनाउने हो भने जातीय विभेदलाई अन्त्य गर्ने राज्यले नीति लिनुपर्छ । त्यसका लागि विशेषाधिकार र आरक्षण हुनुपर्छ । कानून बराबरी छ भनेर मात्र हुँदैन । के यो जातीय र नश्लवादी कुरा हो ?’, उनको प्रश्न छ ।

राजेन्द्रको जातीय अभिव्यक्तिले गठबन्धनका घटक सशंकित देखिन्छन् । गठबन्धनको प्रमुख दल कांग्रेस भोजपुरका सभापति विनोद बान्तवाले नेपाल प्रेससँगको अन्तर्वार्तामा भनेका थिए, ‘सबै प्रदेशको नामाकरण र राजधानी सकिँदा १ नम्बर प्रदेश अहिले पनि नामविहीन भएकाले मुख्यमन्त्री राजेन्द्र राईमाथि उठ्ने प्रश्नले गठबन्धनलाई घाइते तुल्याउन सक्छ । यसमा हामीले गम्भीर भएर विश्लेषण गर्नुपर्छ ।’

विकासको एजेण्डा उठाउँदै हरि

एमाले उम्मेदवार हरि राई आफ्नो चाहना राजनीतिक पार्टीको नीति, सिद्धान्त बोकेको व्यक्तिसँग प्रतिस्पर्धा गर्ने भएपनि पद र सत्तास्वार्थमा विचारलाई तिलाञ्जली दिएको गठबन्धन र विचार बोकेको पार्टीका साथीसँग प्रतिस्पर्धा गर्नुपर्दा त्यति मजा नलागेको बताउँछन् ।

‘उहाँले अलि बढी सद्भाव भड्काउने अभिव्यक्ति दिइरहनुभएको छ । विकास र स्थायित्वका लागि के गर्ने भन्ने नै छैन’, उनी भन्छन्, ‘पार्टी भनेको दर्शन र सिद्धान्तबाट चल्नुपर्छ, जातीय क्षेत्रीय एजेण्डा बोक्नु हुँदैन । एकल पहिचानका एजेण्डालाई त भोजपुरका जनताले यसअघि नै पराजित गरिसकेका छन् नि ।’

हरिले आफ्नो निर्वाचन क्षेत्रमा पर्ने पालिकाको लागि संकल्प प्रस्तुत गरेका छन् । उनले समृद्ध षडानन्द, समृद्ध साल्पासिलिछो, समृद्ध टेम्केमैयुङ र अरुणका लागि ऊर्जा, सडक, स्वास्थ्य, शिक्षा, खानेपानी, कृषि, पर्यटनलगायतका क्षेत्रमा गर्ने कामलाई एजेण्डा बनाएका छन् ।

‘विकासका मेरा एजेण्डा नारामात्र नभएर रोडम्यापसहितको हो । मसँग जनतामाझ जाने स्पष्ट खाका र प्रतिबद्धता छ’, उनी भन्छन् ।

चुनावी अंकगणितः

यो निर्वाचन क्षेत्रमा षडानन्द नगरपालिका, साल्पासिलिछो गाउँपालिका पूरै पर्छन् । टेम्केमैयुङको १ देखि ५ नम्बर वडा यस क्षेत्रमा पर्छन् भने भोजपुर नगरपालिकाका १, २, ३, ४, ५ र १० नम्वर वडा पर्छन् । पौवादुङमा गाउँपालिकाका वडा नम्बर १ र २ पनि यही क्षेत्रमा पर्छन् ।

हालै सम्पन्न स्थानीय तह निर्वाचनमा गठबन्धनसँगको प्रतिस्पर्धामा विगतको भन्दा एमालेले केही धक्का खाएको छ । षडानन्द नगरपालिकाको मेयर विगतमा कांग्रेसले जितेकोमा यसपटक गठबन्धनबाट कांग्रेस उम्मेदवारलाई हराएर एमालेका सुरेन्द्र उदासले जिते । साल्पासिलिछोमा भने एमालेका बागीले जिते । भोजपुर नगरपालिका मेयर कांग्रेस र उपमेयर एमालेले जित्यो । यहाँ गठबन्धनबाट उम्मेदवार भएकी नेकपा एसकी ममिता राईले उपमेयर हारिन् । वडाध्यक्ष भने भोजपुरका ६ वटै वडामा गठबन्धनले जितेको छ । पौवादुङमाको १ मा एमालेले जित्यो भने २ मा गठबन्धनले ।

अघिल्लो चुनाव अध्यक्ष-उपाध्यक्षसहित सानदार ढंगले जितेको एमालेलाई टेम्केमैयुङमा यसपटक चोट पर्‍यो । यहाँ ध्रुव राईले चुनाव हारे । उनको ठाउँमा गठबन्धनबाट कांग्रेसका सरोज बस्‍नेतले जिते । उपाध्यक्ष भने एमालेकी रमा राईले जितिन् ।

समग्र मत विश्लेषण गर्दा यो क्षेत्रमा सत्ता गठन्धनको मत २२ हजार १९६ छ । जसमा कांग्रेसको १४ हजार ४६९, माओवादीको ५ हजार ७५३ र नेकपा एकीकृत समाजवादीको १ हजार ७९४ मतभार छ । नेकपा एमालेको १४ हजार ५४ छ । साल्पासिलिछोमा बिग्रिएको केही मत सुध्रिने, गठबन्धन दलमा देखिएको असन्तुष्टि र आफ्ना एजेण्डाले त्यो मत तान्नसक्ने एमालेको आँकलन छ ।

दुवै गठबन्धनको स्थानीय तहको मत विश्लेषण गर्दा ८ हजार १४२ मतले एमाले पछि छ । तर, प्रदेश सांसदको चुनावमा स्थानीय तहको मत सबै तीनै दलका उम्मेदवारमा नजाने र उम्मेदवारको व्यक्तित्वको पहिचान र एजेण्डाले पनि फरक पार्न सक्छ ।

राजेन्द्र एकपटक जनताबाट टेस्टेड भइसके । चुनावी मैदानमा डेब्यूमा छन् हरिबहादुर । दुवै नेताको क्रियाशीलता लोभलाग्दो छ ।

यी दुवैजना प्रतिस्पर्धा गरिरहेको क्षेत्र शिक्षा र जागरणको हिसाबले प्रदेश १ कै सचेत मतदाता रहेको क्षेत्र हो । नारी अधिकारकी अग्रज योगमायादेखि शिक्षाको ज्योती छर्ने आबाल ब्रम्हचारी षडानन्दको जन्मभूमि हो यो क्षेत्र । यहाँ बाहुन, क्षेत्री र राई, तामाङ, शेर्पा समुदायको मिश्रित बसोबास छ ।

प्रतिक्रिया

One thought on “भोजपुरमा मुख्यमन्त्री राजेन्द्र राई भर्सेस हरिबहादुर : चुनावी एजेण्डा-पहिचान कि समृद्धि ? (भिडिओ)

  1. Samagra ma haerne jo vane dubai jana ramrai neta maninxa tesma alik maan naoareko rajendra ko kuro vaneko jatiya adhharma namakaran ho yo tara yesle nai garda dherai votr tannna ni sakne awasta xa tara yo kura na aayeko vaye rajendra lai aru jaatjaati bata pani eamro vote aauthiyo
    Ani salpasilicjho bata UML lai ramrai vote jaana sakxa
    At last dubai jana ramra neta hun. Tara bikash chai naam kai matra hoo

Leave a Reply

Your email address will not be published. Required fields are marked *

सम्बन्धित खवर