माओवादी बन्दसत्र : प्रतिवेदनमा सबैका सुझाव समेट्ने प्रचण्डको प्रतिबद्धता

काठमाडौं । नेकपा माओवादी केन्द्रको आठौं महाधिवेशनअन्तर्गत बन्दसत्र जारी छ । अहिले अध्यक्ष पुष्पकमल दाहाल ‘प्रचण्ड’ ले आफूले प्रस्तुत गरेको राजनीतिक वैचारिक दस्तावेजमाथि उठेका प्रश्नको जवाफ दिइरहेका छन् ।

जवाफको क्रममा उनले सबैको सुझावलाई प्रतिवेदनमा समेट्ने प्रतिबद्धता जनाए ।

‘यहाँ टोली नेताहरूले लिखित नै राख्नुभएको छ । सबैले यो प्रतिवेदनको मुल स्प्रिट सही छ भनुभयो । तर, केही आवेगमा आएर पनि सुझाव दिएको भन्ने पनि रह्यो तर त्यो पनि सुझाव नै हो । म तपाईंहरुलाई विश्वास के दिलाउन चाहन्छु भने यो सिंगै हलको साझा प्रतिवेदन भयो । सबै सबैको सुझाव समेटेर यो प्रतिवेदन तपाईंहरुले पाउनुहुन्छ । म्यासिभ परिवर्तन गर्नुपर्ने मैले देखेको छैन ।’

दिउँसो १ बजेबाट सुरू भएको बन्दसत्रमा निर्वाचन आयोग, लेखा आयोग र अनुशासन आयोगको प्रतिवेदन पारित भएपछि अध्यक्ष प्रचण्डले समूहगत छलफलबाट उठेका प्रश्नमाथि जवाफ दिन सुरु गरेका हुन् ।

प्रचण्डको राजनीतिक प्रतिवेदनमा सामूहिक छलफलका लागि २५ वटा समूह बनाइएको थियो ।

समूहगत छलफलबाट कम्युनिस्ट नेताको आचारण, संस्कार, जीवनशैली, वैचारिक स्पष्टतादेखि अन्तर्राष्ट्रिय विषयसम्म थुप्रै सुझाव आएका छन् । जसलाई दस्तावेजमा समेट्न माग गरिएको छ ।