राप्रपा प्रतिनिधिलाई विद्युतीय मतदाता शिक्षा (तस्बिरहरू)

काठमाडौं । राष्ट्रिय प्रजातन्त्र पार्टीको नयाँ नेतृत्वका लागि आज उम्मेदवारी दर्ता हुँदैछ । भोलि हुने मतदानका लागि बिहान साढे ११ देखि दिउँसो १ बजेसम्म मनोनयन दर्ताको समय तोकिएको निर्वाचन समितिका संयोजक हरिबहादुर बस्नेतले जानकारी दिए ।

राप्रपाले मतदानको लागि विद्युतीय भोटिङ मेसिन प्रयोग गर्ने भएको छ । राम-लक्ष्मणले निर्माण गरेको मेसिनमार्फत मतदान गरिने भएको हो । मतदान, मतगणना गर्न सहज र छिटो हुने भएकोले प्रविधिको प्रयोग गर्न लागिएको राप्रपाले जनाएको छ ।

राप्रपा महाधिवेशनमा ४ हजार ४ सय जना मतदाता छन् । मनोनयनलगायतका चुनावी प्रक्रिया जारी रहँदा विद्युतीय भोटिङबारे प्रतिनिधिलाई मतदाता शिक्षा दिइएको छ ।

अध्यक्षबाहेक ४ उपाध्यक्ष, ३ महामन्त्री र १ सय ४१ जना केन्द्रीय सदस्य चयनका लागि विद्युतीय मेसिनबाट मतदान हुनेछ । उम्मेदवारको अन्तिम नामावली प्रकाशन भएपछि मेसिनमा उम्मेवारको नाम सेटिङ गर्न कम्तीमा २० घण्टा समय लाग्ने प्राविधिकले बताएका छन् ।

केही दिनअघि चितवनमा सम्पन्न नेकपा एमालेको महाधिवेशनमा पनि मतदानका लागि विद्युतीय मेसिन प्रयोग गरिएको थियो ।

राप्रपाको आगामी कार्यकालका लागि कमल थापा र राजेन्द्र लिङ्देन प्यानलसहित चुनावी मैदानमा छन् ।