देशभर जनगणना सुरु, राष्ट्रपतिको सकियो (तस्बिरहरु\भिडिओ)

काठमाडौं । आजबाट देशभर १२ औँ राष्ट्रिय जनगणना सुरु भएको छ । राष्ट्रपति विद्यादेवी भण्डारीको पहिलो विवरण संकलन गर्दै जनगणना सुरु भएको हो ।
राष्ट्रपतिको जनगणना गर्न तथ्यांक विभागका गणकहरु शीतलनिवासमा पुगेका थिए । गणकहरुले सोधेका प्रश्नको राष्ट्रपति स्वयम्ले जवाफ दिएकी थिइन् ।

विभागका महानिर्देशक नेबिनलाल श्रेष्ठसहित गणकको टोलीले शीतलनिवास पुगेर गणना गरेको  विभागले जनाएकाे छ ।

बिहान ९ बजे गणक टोली शीतलनिबास पुगेर राष्ट्रपति भण्डारीको परिवारको गणना गरेर जनगणना कार्य शुरु गरिएको केन्द्रिय तथ्यांक विभागका निर्देशक ढुण्डिराज लामिछानेले नेपालप्रेसलाई बताए ।

उनले भने,‘ गणकले प्रश्न सोध्ने क्रममा कसैलाई पठाइएको थिएन । एकदमै गोप्य तरिकाले गणना गरिएको छ ।’ जनगणनाको प्रश्नावलीमा ८० वटा प्रश्नहरु समावेश गरिएको छ ।

राष्ट्रपतिपछि प्रधानमन्त्री शेरबहादुर देउवाको जनगणना गरिँदै छ । साथै देशभर गणकहरु जनताका घर–घरमा पुगेर जनगणना गरिरहेका छन् ।  ‘मेरो जनगणना मेरो सहभागिता ’ नारासहित आजदेखि शुरु भएको जनगणना मंसिर ९ गते सकिँदैछ । देशैभरको जनगणना गर्न ४० हजार गणक र ८ हजार ५ सय सुपरिवेक्षक खटाइएको छ ।