हर्क साम्पाङले श्रमदानबाट ल्याएको पानी आइपुगेन, धरान काकाकुल

विराटनगर । सामाजिक सञ्जालमा धरानका मेयर हर्क साम्पाङको तरह तरहका स्ट्याटस आइरहन्छन् । स्ट्याटस मात्रै होइन उनी तस्बिर र भिडियोहरू पनि सञ्जालमा पोस्ट गरिरहन्छन् ।

पछिल्लो समय भने उनी धराने जनतालाई पानी खुवाउन प्रयासरत रहेको सामाजिक सञ्जालबाट प्रमाणित गर्न खोजिरहेका छन् ।

यसका लागि उनी कहिले आगो निभाउँदै गरेको अवस्थाका फोटो हाल्न व्यस्त छन् त कहिले रात भरी जङ्गलमा सुतेर खानेपानीको पाइप आगोबाट संरक्षण गरेको प्रचार समेत गरिरहेका छन् ।

कहिले आफ्ना विरोधीहरूले खानेपानीको पाइप काटेको, आगो लगाइदिएको भन्दै सामाजिक सञ्जालमा गाली गर्छन् । उनले पानी ल्याउन खटेको देखाएर सहानुभूति बटुल्न प्रयासरत रहेको देखाइरहँदा धरान भने काकाकुल छ ।

धराबाट पानी नआउने धरानमा ट्याङ्करबाट समेत पानी किनेर खान पालो पर्खनु परेको छ । पानीका कारण होटल विद्यालय र अस्पतालमा समेत समस्या छ । ट्याङ्कर व्यवसायी घनश्याम बुढाथोकी अनुसार अहिले धरान ४१ वटा ट्याङ्करले पानी बेचिरहेका छन् । एउटा ट्याङ्करले दैनिक ५ देखी ७ पटक पानी ओसार्छन् ।

उनले भने ‘तर ट्याङ्करले माग अनुसार पानी पुर्‍याउन सकिरहेको छैन ।’ ट्याङ्करको विकल्पमा अहिले खुला जिप गाडीमा ट्याङ्की र मोटर राखेर पानीको व्यापार गर्न थालिएको छ ।

पानीको हाहाकार हुँदा धराने मेयर साम्पाङ भने सामाजिक सञ्जालमा धराने जनतालाई पानी खुवाउन लागि परेको प्रमाण जुटाउन लागेका छन् ।

धरानमा खानेपानीको चरम सङ्कट आएपछि सर्वसाधारण भने उनको कार्यकक्षमा धर्ना दिन पुग्न थालेका छन् । आइतबार मात्रै वडा नम्बर १,२ र १२ नम्बर वडाका बासिन्दाले धरानमा मेयर हर्क साम्पाङको कार्यकक्ष घेराउ गरेका छन् ।

घेराउ गर्न पुगेका स्थानीयलाई नगर प्रहरीले बल प्रयोग गरेर रोक्नु परेको छ । स्थानीय मेयर साम्पाङको कार्यालय पुग्दा प्रहरी तैनाथ राखिएको थियो ।

खानेपानीको चरम अभाव भएपछि खानेपानी संस्थानले दिन बिराएर पानी पठाउने गरेको थियो ।

दिन बिराएर दिनुपर्ने पालोमा पनि खानेपानी नआएपछि वडा नं १, २ र १२ का बासिन्दाहरूले धरानका मेयर हर्क साम्पाङको कार्यकक्षमा घेराउ गरेका हुन ।

तीन वटा वडाका जनप्रतिनिधिहरूसहित पुगेका वडावासीहरूले धारामा पानी आउन छोडेको ४ महिनाभन्दा बढी भइसकेको गुनासो गरेका छन् । वडा नं १ मा विगत अढाई महिनादेखि पानीको चरम अभाव खेप्नु परेको वडाध्यक्ष यज्ञमणि आचार्यले बताए ।

विगतमा खानेपानी बोर्डमा गएर गुनासो राख्ने गरे पनि बेवास्ता गरिएपछि बोर्डका अध्यक्ष मेयर भएकोले उपमहानगरपालिकामै गएर समस्या राखेको वडाध्यक्ष आचार्यले बताए ।

खानेपानी व्यवस्थापन बोर्डका कार्यकारी निर्देशक राजु पोखरेलका अनुसार धरानमा दैनिक ३ करोड लिटर खानेपानीको माग रहेको छ । धरानमा अहिले दैनिक १ करोड ६० लाख लिटर मात्र पानी ट्याङ्कीमा खसिरहेको छ । श्रोत सुकेका कारण वेल सुकेकाले पानीको समस्या भएको पोख्रेलले बताए ।

धरानको खानेपानी वितरणमा प्रणालीमा १३ वटा वेलबाट सतहमुनिको पानी आइरहेको छ । तर विद्युतको अनियमितताका कारण ती वेलबाट पनि क्षमता अनुसारको पानी आउन सकेको छैन ।

श्रमदानका नाममा हल्ला खल्ला आएन पानी

धरानका मेयर हर्कको चुनावी एजेन्डा थियो धरानको खानेपानीको समस्या समाधान । उनको यही एजेन्डाबाट काकाकुल धरानेले उनलाई मेयरमा निर्वाचित गराए ।

उनी निर्वाचित भएपछि श्रमदान अभियान सञ्चालन गर्दै विभिन्न श्रोतबाट खानेपानी ल्याउन अभियान सञ्चालन गरे । उनले भालु खोला, निसाने पकुवा, सेउती, सर्दु खर्दु लगायतका खोलाबाट धरानको खानेपानीको नेटवर्कमा पानी ल्याएको दाबी गरे । यस्तै उनले ४२ किलोमिटर टाढा कोकाह खोलाबाट समेत धरानमा पानी झारेकोमा खुसीयाली मनाए ।

तर अहिले श्रोत सुकेका पकुवा, निसाने, भालु खोला र सेउतीबाट एक थोपा पनि पानी झरेको छैन । सर्दु खर्दुबाट तिर तिरे पानी झरे पनि यसले धरानको खानेपानी समस्या समाधानमा कुनै भूमिका नखेल्ने निर्देशक पोख्रेल बताउँछन् ।

उनले भने ६ दिनदेखि कोकोहबाट आएको पानी पनि रोकिएको छ यसले धरानमा पानीको काकाकुल अवस्था सृजना भएको छ । उनले आगोका कारण पाइपमा समस्या भएकाले कोकाहको पानी नआएको बताए ।

धरानका मेयर हर्क साङ्गोपाङ्ग योजनामा पाइप तानेर कोकाहबाट पानी ल्याइएको छ । जमिन माथि पाइप नपुरी पानी ल्याएका कारण खानेपानीको पाइपमा आगोलागिको पोख्रेलले बताए ।

धरानको मेयर साम्पाङ अहिले पनि मेयर साम्पाङ डढेलोबाट पाइपलाई क्षति हुन नदिने अग्निरेखा ९फायर लाइन० बनाउन जाने गरेका छन् ।

जनता पानी नपाएर काकाकुल हुँदा पनि मेयर साम्पाङले वितरण प्रणालीलाई व्यवस्थित गरेर समस्या हल गर्न ध्यान नदिएको भन्दै सामाजिक सञ्जालमा चर्को आलोचना भइरहेको छ ।