रविन्द्र मिश्रको चर्चित दस्तावेज विवेकशील-साझाद्वारा पारित

काठमाडौं । विवेकशील-साझा पार्टीका अध्यक्ष रवीन्द्र मिश्रले सार्वजनिक गरेको बहुचर्चित राजनीतिक दस्तावेजलाई सो पार्टीको केन्द्रीय समिति बैठकले पारित गरेको छ । केन्द्रीय समितिका दुईतिहाइ सदस्यहरूको समर्थनमा दस्तावेज पारित भएको हो ।

मिश्रले केही समयअघि संघीयता खारेज गर्नुपर्ने तथा धर्मनिरपेक्षतामा जनमत संग्रह गर्नुपर्ने मतसहितको राजनीतिक दस्तावेज सार्वजनिक गरेका थिए । उक्त दस्तावेजमा संयोजक मिलन पाण्डे असन्तुष्ट भएपछि विवाद बढेको थियो ।

विवाद लम्बिँदै गएपछि मिश्रले एकलरुपमा केन्द्रीय कमिटी बैठक बोलाएर दस्तावेज पारित गराएका हुन् । पार्टीका दुईतिहाइ केन्द्रीय सदस्य मिश्रको पक्षमा छन् ।

पार्टीका १२४ सदस्यमध्ये आज वैठकमा उपस्थित ९१ सदस्यले सर्वसम्मतिबाट दस्तावेज अनुमोदन गरेको प्रवक्ता शरदराज पाठकद्वारा जारी विज्ञप्तिमा उल्लेख छ ।

पार्टी प्रवक्ता शरदराज पाठकले फरक मत राख्ने समूहलाई पनि आजको वैठकमा सहभागी गराउन हरसम्भव प्रयत्न गरिए तापनि सफल नभएको बताए ।

‘हामीले उहाँहरुलाई पार्टी वैठकमा आएर प्रक्रियागत ढंगले आफ्नो फरकमतलाई स्थापित गर्ने कोशिषमा लाग्न अनुरोध गरेका हौं । तर उहाँहरु आउनुभएन,’ उनले भने ।

पार्टीलाई डेडलकको अवस्थाबाट निकाल्नका लागि अध्यक्षले बैठक डाकेर निर्णय लिनुपरेको उनको भनाइ छ ।

‘विवेकशील साझा पार्टी भनेको अध्यक्ष र संयोजक मात्र होइन, त्यसैले उहाँहरुको सहमति नहुँदा पार्टी नै अनिर्णयको बन्दी हुनुहुँदैन भन्ने अधिकांसको मत रहेको छ,’ उनले भने ।