प्रदेश २ को नीति तथा कार्यक्रम : प्राथमिकतामा स्वास्थ्य, कृषि तथा रोजगार (पूर्णपाठ)

जनकपुधाम । प्रदेश २ सरकारले आर्थिक वर्ष २०७८÷०७९ को नीति तथा कार्यक्रम सार्वजनिक गरेको छ । प्रदेशसभामा प्रदेश प्रमुख डा. राजेश अहिराजले प्रस्तुत गरे ।

अगामी आर्थिक वर्षको नीति तथा कार्यक्रममा प्रदेश सरकारले स्वास्थ्य क्षेत्रलाई विशेष प्राथमिकता दिएको छ । कोरोनाबाट जोगाउन संघीय सरकारसँग सहकार्य गरी सबै प्रदेशबासीलाई खोपको सुविधा उपलब्ध गराउने घोषणा गरिएको छ ।

कोरोना नियन्त्रण र उपचारका लागि सार्वजनिक नीजि साझेदारीको नीति अबलम्बन गरिनेछ । प्रकोप तथा महामारीबाट हुने मृत्युदर कम गर्न सुविधायुक्त प्रदेश स्वास्थ्य आपतकालिन केन्द्रको स्थापना गर्नेछ । प्रादेशिक अस्पताल जनकपुरलाई ५ सय शैयामा सहितको अत्याधुनिक विविशष्टकृत अस्पतालमा स्तरोन्न्ती गरि स्वास्थ्य सेवा उपलब्ध सरकारले घोषणा गरेको छ ।

महामारी तथा आकस्मिक रोगहरुको उपचारका लागि प्रादेशिक तथा जिल्ला अस्पतालहरुमा विशेष व्यवस्था मिलाइने भनिएको छ । यस्तै प्रदेशको पूर्वपश्चिम राजमार्ग अन्तर्गत बाराको पथलैया तथा सप्तरीको रुपनीमा ट्रमा अस्पताल सञ्चालनमा ल्याउने घोषणा प्रदेश सरकारले गरेको छ ।

दलित सशक्तिकरण ऐनले व्यवस्था गरेको प्रदेशभित्रका दलित लगायत सीमान्तकृत तथा विपन्न परिवारहरुको निःशुल्क स्वास्थ्य बिमा कार्यक्रम संचालन गरिने घोषणा पनि गरेको छ । गुणस्तरीय प्रयोगशाला सेवाका लागि प्रदेश जनस्वास्थ्य प्रयोगशालालाई अत्याधुनिक भवन, उपकरणसहित आठै जिल्लाका प्रयोगशालाहरुको सुदृढीकरण गरिने भनिएको छ ।

कोभिड -१९ का कारणले रोजगारी गुमाएका यूवाहरुका लागि ‘मुख्यमन्त्री युवा स्वरोजगार तथा उद्यम विकास’ कार्यक्रम सञ्चालन गर्ने प्रदेश सरकारले घोषणा गरेको छ । गरिबी न्यूनिकरणका लागि लघु उद्यम विकास कार्यक्रमलाई प्रदेश अनुकुल परिमार्जन गरी विपन्न परिवारलाई रोजगारीको अवसर सृजना गरिने नीति तथा कार्यक्रममा उल्लेख छ ।

वैदेशिक रोजगारीबाट फर्केका वा स्वदेशमै उद्यम गर्न उत्साहित यूवाहरुलाई प्रोत्साहन गर्न ‘नवप्रवर्तन कृषि रोजगार तथा व्यवसाय प्रवद्र्धन कार्यक्रम’लाई निरन्तरता दिइएको छ । वीरगञ्ज, जनकपुरधाम र राजविराजमा सीप विकास केन्द्र खोल्ने कामलाई अगाडी बढाउनेछ ।

प्रदेशभित्र रहेका विपन्न दलितहरुलाई लक्षित गरी दलित छात्रवृत्ति र रासन कार्ड योजना कार्यान्वयनमा ल्याइनेछ । यो योजना गत वर्षकै नीति तथा कार्यक्रममा उल्लेख थियो । साथै प्रदेशका डोम, हलखोर, मेस्तर र मुसहर जातिका परिवारलाई जीविकोपार्जनका लागि विशेष प्याकेजका कार्यक्रमहरु सञ्चालन गर्ने घोषणा पनि गरिएको छ ।

कृषितर्फ सिँचाई योजनालाई विशेष प्राथमिकता दिइएको छ । कृषि क्षेत्रमा आमधारित साना र मझौला उद्योग तथा सहकारी क्षेत्रका संस्थापनहरुलाई कर र शुल्क छुट, ऋणमा सहुलियतपूर्ण सुविधा तथा साना अनुदान कार्यक्रम संचालन गर्ने भनिएको छ । उखु कृषकहरु र चिनी उद्योगहरुको संरक्षण तथा सम्बद्र्धनका लागि सहजीकरण गर्न विशेष कार्यक्रमको प्याकेज तयार गरी कार्यान्वयण गरिनेछ ।

 

प्रतिक्रिया

Leave a Reply

Your email address will not be published. Required fields are marked *