नेपाललाई सहायता जुटाउन कस्सिए प्रबल गुरुङ, खोपको प्राथमिकतामा राख्न अमेरिकालाई आग्रह

काठमाडौं । कोभिड-१९ महामारीको दोस्रो लहरले आक्रान्त आफ्नो मुलुकलाई सहायता दिलाउन हलिउड फेसन डिजाइनर प्रबल गुरुङ कस्सिएका छन् ।

गैरनाफामूलक सामाजिक संस्था नेपाल राइजिङमार्फत गुरुङले नेपालका विभिन्न अस्पताल र सामाजिक संस्थालाई अत्यावश्यक अक्सिजन सिलिन्डरसहित कोभिड उपचारमा प्रयोग हुने सामग्री जुटाउन पहल गरिरहेका छन् ।

सीएनएन टेलिभिजनमा अन्तर्वार्ता दिँदै गुरुङले आफू उक्त संस्थामार्फत ग्राउन्ड जिरोमै पुगेर स्वास्थ्य सहायता प्रदान गरिरहेको बताए । उनका अनुसार उक्त संस्थाले जरुरी स्वास्थ्य सामग्रीसहित राहत समेत प्रदान गरिरहेको छ ।

नेपालमा भाइरसको कारण कठिन परिस्थिती रहेको बताउँदै गुरुङले थप सहायताका लागि आफूहरु खटिएको समेत जनाए । उनले अन्तर्राष्ट्रिय समुदायलाई पनि नेपाललाई सहयोग गर्न अपिल गरेका छन् ।

नेपाललाई अहिले खोपको जरुरी रहेको बताउँदै खोप दिलाउने हालैको घोषणाप्रति अमेरिकी राष्ट्रपति जो बाइडेनलाई धन्यवाद समेत दिए । अक्सिजन र उपचार अभावमा आफन्त र साथीभाइको मृत्यु भएको देख्दा आफू विक्षिप्त भएको समेत प्रबलले बताएका छन् ।

“Everyone says this pandemic is an equalizer, it really isn’t. It’s a mirror to the world on the difference between the haves & have nots.”

Fashion Designer @prabalgurung discusses his aid work in homeland #Nepal, and asks the US govt to provide urgently needed #vaccines. pic.twitter.com/LaHhTSJ2o9

— Julia Chatterley (@jchatterleyCNN) June 3, 2021

प्रबलले नेपालमा शिक्षा फाउन्डेसन पनि संचालन गरिरहेका छन् । उनको अर्को सामाजिक संस्था नेपाल राइजिङले विदेशमा रहेका नेपाली र अन्तर्राष्ट्रिय समुदायमार्फत रकम संकलन पनि गरिरहेको छ ।