एक-अर्कालाई निष्कासन गर्ने महन्थ र उपेन्द्रको पत्रबारे के गर्दैछ आयोग ?

काठमाडौं । जनता समाजवादी पार्टी (जसपा) का दुई पक्षले एक अर्कालाई निष्कासन गर्दै दिएको जानकारीको अध्ययन गरिरहेको निर्वाचन आयोगले जानकारी दिएको छ ।

आयोगका प्रवक्ता राजकुमार श्रेष्ठले दुवै पक्षले पार्टीको साधारण सदस्यबाट निष्कासन गरेको जानकारी आयोगमा आएको र उक्त निर्णयको वैधता जाँच्ने काम भइरहेको बताए ।

‘दुवै पक्षले आ-आफ्नो निर्णय अनुसार पार्टीको साधरण सदस्यबाट निष्कासन गरिएको भन्ने सन्दर्भको व्यहोरा चाहिँ आयोगमा दर्ता भएको छ,’ नेपाल प्रेससँग श्रेष्ठले भने, ‘उहाँहरूले राजनीतिक दल सम्बन्धी ऐन २०७३ को दफा ५१ बमोजिम भन्नु भएको छ। दर्ता किताबबाट नाम हटाएर अद्यावधिक गरिदिनु भन्ने छ। यसमा आयोगले अहिले केही गरिसकेको छैन ।’

दुवै पक्षका निर्णय हेरेर कुनैको पर्याप्त लागेमा आयोगले निर्णय गर्ने श्रेष्ठले बताए । उनले भने, ‘गर्न मिल्ने, नमिल्ने, कागजातहरू पुगेको छ/ छैन भन्ने कुरा सम्बन्धित शाखा, महाशाखाबाट आयोगमा पेस हुन्छ । त्यसमा आयोगले निर्णय लिन्छ । तर, आयोगले निर्णय गर्नलाई यो पर्याप्त हो कि होइन भन्ने कुरा नै बाँकी छ ।’

जसपाको उपेन्द्र यादव पक्षले मंगलबार अध्यक्ष महन्थ ठाकुर, राजेन्द्र यादव, लक्ष्मणलाल कर्ण र सर्वेन्द्रनाथ शुक्ललाई पार्टीको साधारण सदस्यबाटै निष्कासन गरेको थियो । उक्त जानकारी आयोगमा पठाउँदै दर्ता किताबाट नाम हटाउन आग्रह गरेको थियो ।

त्यसको ‘काउन्टर’ मा ठाकुर पक्षले यादवलाई पनि पार्टीबाट निष्कासन गर्दै उस्तै व्यहोरा आयोगमा जानकारी दिएको थियो ।