आवश्यक परे राज्यसत्ता विरुद्ध बन्दुक बोकेर लड्न तयार छौंः विप्लव – Nepal Press

आवश्यक परे राज्यसत्ता विरुद्ध बन्दुक बोकेर लड्न तयार छौंः विप्लव

रुपन्देही । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले आवश्यक परे राज्यसत्ताका विरुद्ध बन्दुक लिएर पनि हिँड्न तयार रहेको बताएका छन् । कपिलवस्तु शिवगढीमा आयोजित विप्लव नेतृत्वकै नेकपाको भातृ संगठन अखिल नेपाल महिला संघको सम्मेलन उद्घाटन समारोहलाई सम्बोधन गर्दै उनले यस्ताे बताएका हुन् ।

जनतालाई दुख दिने आफ्नो पार्टीको एक इन्च पनि मनाशय नभएको र आफ्ना मुद्धा देशको स्वाधिनता, समृद्धि, राष्ट्रियता, न्यायको विरुद्ध रहेको उनले बताए । उनले भने ‘राज्यले लगाएको प्रतिबन्ध र नेपाल कम्युनिस्ट पार्टीका नेता तथा कार्यकर्तालाई दमन गर्नु गलत थियो । त्यसको हामी प्रतिकार गर्यौ र गर्छौ ।’

उनले भने ‘हामीले भ्रष्टचार, अन्याय–अत्याचार, बलात्कार, महंगी लगायत देशका तमाम समस्याको विरुद्ध आवाज उठाउँदा राज्यले हामीलाई दमन गरी प्रतिबन्ध लगायो । हाम्रो लडाई कुनै प्रहरी, सेना, शसस्त्रसंग नभई राज्यसत्ता संगको हो ।’

जनयुद्ध पश्चात् प्रचण्ड र बाबुरामले गलत बाटो राजेको र त्यसैको परिणाम अहिलेको राजनीतिक परिस्थितीमा देखिएको र जनताको मत पाएर जनताको छातीमा टेकेर हिँड्नेले कहिल्यै जनताको समस्या समाधान नगर्ने उनको भनाइ छ । न्यायको लागि संघर्ष गर्न तयार हुने र संघर्षको सबैभन्दा ठूलो हतियार नै संघर्ष भएको उनले बताए ।

जनयुद्धमा सहादत प्राप्त गरेका सहिदको चाहना र सपना पूरा नभएको र सहिद तथा बेपत्ता परिवारले न्याय नपाएको विप्लवले बताए । उनले वर्तमान दलाल पुंजीवादी व्यवस्था असफल भएको बताउदै जनतालाई वर्तमान दलाल पुंजीवादी व्यवस्था की वैज्ञानिक व्यवस्था ठिक भनेर एकपटक जनतालाई जनमत संग्रह गर्न दिनुपर्नेमा जोड दिए ।

जनताको न्याय र दमनको विरुद्ध आवाज उठाउँदा मृत्यु पनि सह्य र प्रिय हुने उनले बताए । एकिकृत जनक्रान्तिको कार्यदिशा नै सबैभन्दा सुन्दर बाटो भएको समेत विप्लवले स्पट पारे । महासचिव विप्लवले राज्यले महिलालाई समान अधिकार र अवसर दिनुपर्नेमा पनि जोड दिएका छन् ।

प्रतिक्रिया

Leave a Reply

Your email address will not be published.