बालेनका ‘डुब्लिकेट’ सुनीलले गरे काठमाडौं- ९ बाट चुनाव लड्ने घोषणा
‘बालेनले गलत गर्दा मलाई गाली आउँछ’
नेपाल प्रेस
२०७९ भदौ २ गते १७:०८
काठमाडौं । काठमाडौं महानगरपालिकाका मेयर बालेन्द्र साहका डुब्लिकेटका रुपमा टिकटकमा चर्चित सुनिल रिजाल पनि राजनीतिमा होमिने भएका छन् । काठमाडौंको क्षेत्र नम्बर ९ बाट प्रतिनिधिसभामा उम्मेदवारी दिने उनको तयारी छ ।
भोलि पत्रकार सम्मेलन गर्दै उम्मेदवारीको औपचारिक घोषणा गर्ने रिजालले बताए । बालेन्द्रले जस्तै उनले पनि स्वतन्त्र उम्मेदवारी दिन लागेका हुन् । जित्ने लक्ष्यसहित चुनावमा होमिन लागेको र तयारी सुरु गरिसकेको उनले बताए ।
नेपाल प्रेससँग कुराकानी गर्दै रिजालले आफू लामो समयदेखि समाज सेवामा संलग्न रहेको भन्दै आफ्नो क्षेत्रमा राम्रै पकड रहेको दावी गरे । जनताकै आग्रहमा आफूले उम्मेदवारी दिन लागेको उनको भनाइ छ ।
‘सबैसँग फिडब्याक लिएरमात्रै चुनावमा होमिने निधो गरेको हुँ’, उनले भने ।
चन्द्रागिरी नपा- १३ का स्थायी बासिन्दा रिजाल विगतमा सरकारी सेवामा थिए । गरिबी निवारण कोषमा लेखा तथा प्रशासन महाशाखा प्रमुख भएर काम गरेको उनले बताए । कोष खारेजीमा परेपश्चात उनी सरकारी सेवाबाटै बाहिरिएका हुन् । आफू लायन्स क्लब अफ काडमाडौं दियालोको संस्थापक अध्यक्षसमेत रहेको उनले जानकारी दिए । सरकारी सेवामा प्रवेशअघि उनी निजी क्षेत्रमा अडिटिङको काम गर्थे । उनको सीएको पढाइ भने अधुरो छ ।
‘म अहिलेसम्म कुनै पार्टीको नजिक भइनँ’, रिजाल भन्छन्, ‘सरकारी सेवामा रहेर प्राप्त गरेको अनुभवलाई राजनीतिमार्फत सदुपयोग गर्न चाहन्छु ।’
सुनीललाई झट्ट हेर्दा जोकोही झुक्किन्छन् । टी-सर्टमाथि कोट, कालो टोपी र कालो चस्मा लगाएर हिँडे भने त नमस्कार खाँदैको हैरान हुन्छ । तर, आफूले नियतबस बालेनको कपी गर्न भने नखोजेको उनले दाबी गरे ।
‘मेरो नेचुरल हाउभाउ नै यस्तै हो, कपाल पातलो भएकाले टोपी लगाउन थालेको हुँ’, उनले भने ।
यद्यपि टिकटकमा भने उनले बालेनको गेटअप र बडी ल्याङ्ग्वेज कपी गरेरै फलोअर्स बटुलिरहेका छन् । पहिले बालेनको कपी गर्नुअघि उनका कम फलोअर्स थिए । अहिले एक लाख १८ हजार पुगेका छन् । टिकटकमा सुरु-सुरुमा धेरै मान्छेहरु झुक्किए । बालेन नै भन्ठानेर कमेन्ट गरे । तर, अहिले विस्तारै सबैलाई थाहा हुन थालेको छ । तैपनि अझै कतिपय झुक्किन्छन् ।
https://www.tiktok.com/@sunilrijal7/video/7113915271483608346?_d=secCgYIASAHKAESPgo8i3flyXxo5JBYHaBqPBFH9DkpzFt%2Fu8T%2BdiXm9l1matM7AWzWz3j8o5k59%2FqnamCjyGGziT3kSaMomhGpGgA%3D&_r=1&checksum=&is_from_webapp=v1&item_id=7113915271483608346&language=en&preview_pb=0&sec_user_id=MS4wLjABAAAAweskhgI0TGQ_2DhcpmEDRV937Lu9sBLpCumxnjNVWMEA6QPhK9tAcGdLm4KncYTR&share_app_id=1233&share_item_id=7113915271483608346&share_link_id=b719a03b-acea-49d9-9138-b0af68e7595a&source=h5_m×tamp=1660820719&u_code=d1bm1i2a78g852&user_id=6585782839277748230&utm_campaign=client_share&utm_medium=android&utm_source=messenger
आफू स्वयंलाई बालेनसँग अनुहार मिल्छ जस्तो नलाग्ने उनले बताए । ‘धेरैले भने पनि म पनि बारम्बार ऐनामा हेर्न थालेँ, तर आफूलाई बालेनजस्तो देख्दिनँ’, उनले भने ।
उनले दाह्री पहिल्यैबाट पाल्थे । बालेन चर्चामा आएसँगै मानिसहरु झुक्किएको महसुस गर्न थालेपछि रिजालले बालेनको गेटअप कपी गर्न थालेका हुन् । एकपछि अर्को भिडियो भाइरल भएपछि उनी पनि हौसिए । तर, आजकाल भने सुनील रिजालकै रुपमा प्रस्तुत हुन थालेका छन् ।
‘सुरुमा चर्चा पाउन अलिकति जुक्ति पनि लगाउनुपर्ने हुँदोरहेछ’, उनले भने, ‘त्यसैले मैले पनि बालेनको रुपमा केही टिकटक बनाएकै हुँ । तर, अब म आफू जे छु, त्यही रुपमा प्रस्तुत हुनेछु ।’
त्यसो भने पनि चुनावी पोष्टरमा पनि उनले बालेनकै कपी गरेका छन् । कालो टोपी र काँधमा राष्ट्रिय झण्डा ओडेको तस्वीरमा उनी बालेनजस्तै देखिएका छन् ।
चुनावमा पनि जनतालाई झुक्याएरै भोट ल्याउने चेष्टा गर्नुभएको हो भन्ने नेपाल प्रेसको प्रश्नमा उनले त्यस्तो सम्भव नै नहुने बताए ।
‘म आफ्नै पृष्ठभूमि र योगदानका आधारमा चुनावी परीक्षा दिन आएको हुँ । अरुको नाम बेचेर भोट कमाउने उद्देश्य छैन’, उनले भने, ‘फेरि मतदाता त्यति अबुझ पनि हुँदैनन् ।’
आफूले अहिलेसम्म बालेनलाई प्रत्यक्ष नभेटेको रिजालले बताए । यद्यपि बालेनको टीमका व्यक्तिहरुलाई विभिन्न सल्लाह–सुझाव दिँदै आएको उनको भनाइ छ ।
‘मसँग सरकारी सेवामा काम गर्दाको धेरै अनुभव छ । त्यही आधारमा कसरी काम गर्ने भनेर उनीहरुलाई सुझाव दिइरहेको छु’, उनले भने ।
रिजालले केही समयअघि माओवादी केन्द्रका अध्यक्ष पुष्पकमल दाहाल प्रचण्डसँग भेट गरेका थिए । गरिबी निवारण कोषमै हुँदा उनी एउटा अनुसन्धानको विषयमा जानकारी गराउन प्रचण्ड निवास पुगेका थिए । बालेनकै भेषमा आएका रिजाललाई देखेर प्रचण्ड नराम्ररी झुक्किए पनि ।
‘बालेनसँग अस्ति भर्खर भेटेको थिएँ, फेरि किन आउनुभएछ भनेर सोच्दै थिएँ’, रिजालले आफूलाई चिनाइसकेपछि प्रचण्डले भने ।
बालेनसँग भने अहिलेसम्म उनको भेट भएको छैन । कोषमा रहँदाखेरी भेट्न खोजे पनि सम्भव नरहेको उनले बताए ।
बालेनका कारण आफूलाई फाइदा र बेफाइदा दुवै भएको बताउँछन् रिजाल । ‘उहाँले राम्रो काम गर्दा मलाई पनि राम्रो कमेन्ट आउँछ, नराम्रो गर्नुभयो भने गाली आउँछ’, उनले भने । त्यसो त आफ्नो कारणले पनि बालेनलाई फाइदा भइरहेको उनको दाबी छ ।
‘अहिले त उहाँको भन्दा मेरै मार्केट राम्रो छ,’ रिजालले भने ।
https://www.tiktok.com/@sunilrijal7/video/7109476904754793755?_d=secCgYIASAHKAESPgo8tvxpsvGn3nOuKBJ0rDmSWsFhame3dl7eJNAZgN3bOJ3orqJAagq6slOUOf%2FbgQvys1RohydaiRwmeT4HGgA%3D&_r=1&checksum=15fa3a83ba25b244974c42534fc47e68af58ee593ad6732fa4e1422e8750efd0&is_from_webapp=v1&item_id=7109476904754793755&language=en&preview_pb=0&sec_user_id=MS4wLjABAAAAweskhgI0TGQ_2DhcpmEDRV937Lu9sBLpCumxnjNVWMEA6QPhK9tAcGdLm4KncYTR&share_app_id=1233&share_item_id=7109476904754793755&share_link_id=81838666-ce3c-41fa-a12d-83252d432c13&source=h5_m×tamp=1660821781&u_code=d1bm1i2a78g852&user_id=6585782839277748230&utm_campaign=client_share&utm_medium=android&utm_source=messenger
नेपाल प्रेस
प्रकाशित: २०७९ भदौ २ गते १७:०८
प्रतिक्रिया
सम्बन्धित खवर
