कार्यक्षेत्रबाहिर पनि बालेन्द्रको चासो, सेयर लगानीकर्ताको अनशनमा पुगेर जनाए ऐक्यबद्धता (भिडिओ) – Nepal Press

कार्यक्षेत्रबाहिर पनि बालेन्द्रको चासो, सेयर लगानीकर्ताको अनशनमा पुगेर जनाए ऐक्यबद्धता (भिडिओ)

सेयर बजार अनुत्पादक क्षेत्र होइन: बालेन्द्र

काठमाडौं । काठमाडौं महानगरपालिकाका मेयर बालेन्द्र साहले आफ्नो कार्यक्षेत्रभन्दा बाहिरको विषयवस्तुमा पनि चासो देखाउन थालेका छन् ।

बुधवार उनी नेपाल धितोपत्र बोर्डको कार्यालय परिसरमा पुगेर एक सेयर लगानीकर्ताले गरिरहेको अनशनप्रति ऐक्यबद्धता जनाए ।

सेयर बजारमा तीव्र गिरावट आएपछि लगानीकर्ता तिलक कोइराला ८ दिनदेखि विभिन्न १९ बुँदे माग राखेर ८ दिनदेखि आमरण अनशनमा छन् । मेयर साह आज उनलाई भेट्न बोर्डमा पुगेका हुन् । सेयर बजारको मामला मेयरका क्षेत्राधिकारभित्र पर्दैन ।

बालेन्द्रनिकट स्रोतले मानवीय हिसाबले अनशनकारीसँग भेट्न जानुलाई अन्यथा लिनु नहुने बतायो ।

‘उहाँ अनशनकारीको माग पुरा गर्छु भनेर जानुभएको होइन,’ स्रोतले भन्यो, ‘अनशनमा बस्नुभएको व्यक्तिलाई भेट्न र स्वास्थ्य स्थिति बुझ्न जानुभएको हो ।’

बोर्डमा सेयर लगानीकर्ताहरूसँग मेयर साहले करिब १५ मिनेट बिताएका थिए । उनलाई सेयर लगानीकर्ताको संघर्ष समितिका व्यक्तिहरूले विभिन्न गुनासो सुनाए ।

४४ खर्बको बजार अहिले २७ खर्बमा झरेको र लगानीकर्ताको बिचल्ली भएको उनीहरूको भनाइ छ ।

‘२ हजार अर्बभन्दा बेसी पैसा हामीले ७–८ महिनामा गुमायौँ,’ एक लगानीकर्ताले भने, ‘४० प्रतिशतको हाराहारीमा बजार खस्किएर ५० लाख लगानीकर्ता सडकमा आउने अवस्थामा सरकार मूकदर्शक भएर बसिरहेको छ ।’

अनशनकारीसँग वार्ता गर्न सरकारले वार्ता टोली बनाउनुपर्ने लगानीकर्ताको माग छ । सेयर बजार बढाउनका लागि सरकारले विभिन्न नीतिगत सुधारका कामहरू गर्नुपर्नेमा उनीहरूले जोड दिएका छन् ।

‘हामीले बजार बढाइदेऊ भनेर गएका होइनौँ,’ उनले भने, ‘पूँजिबजार विस्तार र विस्तार गरी लगानीकर्ताको हित संरक्षणका लागि हो ।’

साहलाई लगानीकर्ताहरूले युवाको ढुकढुकी भन्दै प्रशंसा गरे ।

‘रवि लामिछाने र बालेन्द्र साह भनेको युवाको ढुकढुकी हो,’ उनले थपे, ‘हामी ५० लाख लगानीकर्ताको मागका सम्बन्धमा हजुरका तर्फबाट अर्थ मन्त्रालयमा पहल होस । तपाईँको एक्लो आवाज पनि ठूलो हुन्छ ।’

एउटा बैंकबाट ४ करोड र कुल १२ करोड मात्रै सेयर कर्जा लिन पाउने व्यवस्था खारेज गर्नुपर्ने लगानीकर्ताको प्रमुख माग छ । ४÷१२ को नीतिले सेयर बजार धराशायी बनाउने उनीहरूले दाबी गरेका छन् ।

सेयर लगानीकर्ताहरूलाई सम्बोधन गर्दै साहले राष्ट्र बैंक र अर्थ मन्त्रालयले वार्तामा बसेर निकास दिनुपर्ने बताए ।

उनले भने, ‘नेप्से बढ्यो वा घट्यो भन्दा पनि लगानीकर्ताले किन आत्तिएर सेयर बेचे भन्ने महत्त्वपूर्ण हो । लगानीकर्ताको समस्यामा म गम्भीर छु ।’

मेयर साहको थप भनाइ यस्तो थियो :

‘राष्ट्र बैंक र सरकारले सधैँ नयाँ–नयाँ नियम ल्याउँछन् । यस्ता नियम प्राय पपुलिस्ट खालका र टार्गेटेड हुन्छन् । यसले बजारलाई र अर्थतन्त्रलाई कस्तो असर पार्छ भन्ने हेरिँदैन ।

‘सेयर बजारलाई अनुत्पादक क्षेत्र भन्ने गरिएको छ । त्यस्तो होइन । यो उत्पादनशील क्षेत्र नै हो । सबैले अहिले घरमै बसेर विभिन्न प्रोजेक्टका लागि लगानी गर्न पाएका छन् । स्थानीय सरकारले पनि सबै आयोजनाका लागि एक्लै पैसा व्यहोर्न सक्दैन । केही प्रतिशत आफूले राखेर केही पब्लिकबाट आह्वान गर्नुपर्छ ।’

‘यो पूँजिबजारलाई हामीले जोगाएर राख्नुपर्छ । हामीसँग देशमा उत्पादनशील उद्योगहरू छैनन् । यदि यो नभएको हाइड्रोपावरहरू यति धेरै बन्दैन थिए होलान् । हामी अझै पनि लोडसेडिङमै बस्नुपर्थ्यो होला ।’

‘सरकारले अलिक हेलचेक्राइ गरेको जस्तो देखियो । कतिपय ठाउँमा मिसयुज पनि भयो होला । सबै बैंकबाट लोन लिँदा सदुपयोग नै हुन्छ भन्ने छैन । तर, त्यसलाई लिएर समग्र बजार नै गलत भन्न भएन । नेपालमा कोही मान्छेले पैसा कमायो भने त्यसलाई राम्रो नजरले हेरिँदैन । तर कतै लगानी गरेर पैसा कमाउनु भनेको गलत होइन ।’

‘बाहिरबाट हेर्दा सेयर बजार बढाइदिनु परो भनेर आन्दोलन गरिएजस्तो बुझाइ छ । तर त्यो होइन । घट्यो वा बढ्योसँग सरोकार छैन । यो अलिकति टार्गेटेड भयो । मान्छेहरू डराएर आत्तिएर बेच्न बाध्य भए । त्यो चिन्ताको विषय हो ।’

‘लगानीकर्ताको मागमा हाम्रो पनि समर्थन छ । हाम्रोतर्फबाट के गर्न सकिन्छ त्यसमा लाग्छौँ । बजारलाई खस्काउने होइन बलियो बनाउनतर्फ लाग्नुपर्छ । सबै निकाय गम्भीर हुनुपर्छ ।’

बालेन्द्र साह आफैँ पनि सेयर लगानीकर्ता हुन् ।

काठमाडौं महानगरको चुनावमा उनको पक्षमा केही सेयर लगानीकर्ताले संगठित अभियान चलाएको चर्चा थियो ।

प्रतिक्रिया

One thought on “कार्यक्षेत्रबाहिर पनि बालेन्द्रको चासो, सेयर लगानीकर्ताको अनशनमा पुगेर जनाए ऐक्यबद्धता (भिडिओ)

  1. बालेन्द्र out of track हुँदैछन् जस्ताे लाग्याे ।

Leave a Reply

Your email address will not be published.

सम्बन्धित खवर