यी हुन् तीन महानगरमा गठबन्धनबाट कांग्रेसका उपमेयर उम्मेदवार

काठमाडौं । भरतपुर महानगरपालिका गठबन्धनका तर्फबाट कांग्रेसले चित्रसेन अधिकारीलाई उपमेयरको उम्मेदवार बनाएको छ ।

कांग्रेसको भरतपुर महानगर समितिका सभापति रहेका अधिकारीले उपमेयरको टिकट पाएका हुन् । भरतपुरमा गठबन्धनका तर्फबाट नेकपा माओवादी केन्द्रले रेनु दाहाललाई उम्मेदवार बनाएको छ । कांग्रेसभित्र गठबन्धनको विषयमा तीब्र विवाद छ । कांग्रेसको असन्तुष्ट समूहले जगन्नाथ पौडेललाई स्वतन्त्र रूपमा मेयरको उम्मेदवार बनाउँदैछ ।

यसैबीच, कांग्रेसले पोखरा महानगरपालिकाको उपमेयरमा सुरेन्द्रमान बिजुक्छेलाई उम्मेदवार बनाएको छ । उनी कांग्रेसको पोखरा महानगर समितिका सभापति हुन् । पोखरामा गठबन्धनबाट नेकपा एकीकृत समाजवादीले धनराज आचार्यलाई मेयरको उम्मेदवार बनाएको छ ।

त्यस्तै वीरगञ्ज महानगरपालिकाको उपमेयरमा कांग्रेसले इम्तियाज आलमलाई उम्मेदवार बनाउने भएको छ । उनी पर्सा कांग्रेसका सचिव हुन् । पर्सामा गठबन्धनको तर्फबाट जसपाले राजेशमान सिंहलाई मेयरको उम्मेदवार बनाएको छ ।