आर्यन पुनः लभरब्वाइ बन्दै, मधुसुधनको फिल्ममा अनुबन्धित

काठमाडौं । अभिनेता आर्यन सिग्देल निर्देशक मधुसुधन भट्टराईको नयाँ फिल्ममा अनुबन्धित भएका छन् । सोमबार दुबै पक्षबीच लिखित सहमति भएको छ । यो रोमान्टिक फिल्मको शीर्षक चाँडै सार्वजनिक गर्ने तयारी भएको निर्देशकले जानकारी दिए ।

आर्यनलाई यो फिल्ममा समेत लभरब्वाइको रुपमा हेर्न पाइने भएको छ । भट्टराईले निर्देशन गर्ने नयाँ फिल्ममा आर्यन मुख्य भूमिकामा अनुबन्धित भएका हुन् । आरआर फिल्मसको ब्यानरमा बन्ने फिल्मको मुख्य अभिनेत्री सार्वजनिक गर्ने तयारी भएको छ ।

सबै कलाकार तय भएपछि आगामी बैशाखदेखि फिल्म छायांकनको तयारी भएको निर्देशक भट्टराईले जानकारी दिए । यो फिल्म फ्लोरमा जानुअघि निर्देशक भट्टराई हामी तीन भाइको छायांकन सम्पन्न गर्ने तयारीमा छन् ।

पहिलो लकडाउनपछि आर्यनले डिसेम्बर फल्समा काम गरेका थिए तर, अझै केही भाग सुटिङ हुन बाँकी छ । लगत्तै उनले नृत्य निर्देशक कविराज गहतराजले निर्देशन गर्ने फिल्म ‘मिरर’ साइन्ड गरेका थिए । यद्यपी, भाइरस महामारीको जोखिमलाई कारण देखाउँदै फिल्म अहिलेसम्म सुटिङमा गएको छैन । गहतराजले निर्देशन गर्ने फिल्म ‘मिरर’पछि मात्र मधुसुधनको फिल्म फ्लोरमा जाने तयारीमा छ ।

पछिल्लोपटक आर्यनका फिल्महरु बक्सअफिसमा उति सफल छैनन् । जसले गर्दा पनि उनलाई बक्सअफिस र समीक्षात्मकरुपमा सफल फिल्म आवश्यक पर्छ । पछिल्लोपटक आर्यन अभिनित फिल्म क्लासिक मात्र बक्सअफिसमा हिट छ । कोरोना महामारीकै समयमा आर्यनले तीनवटा फिल्म साइन गरिसकेका छन् ।