देशको प्रतिष्ठा अभिवृद्धि गर्न खेलाडी समर्पित छन्, विशेष कार्ययोजना आवश्यक: विश्वप्रकाश शर्मा

काठमाडौं । नेपाली काँग्रेसका प्रवक्ता विश्वप्रकाश शर्माले खेलाडीहरू देशको प्रतिष्ठा अभिवृद्धिका लागि समर्पित रहेकाले उनीहरूको क्षमता अभिवृद्धि गर्न विशेष कार्ययोजना तय गरिनु पर्ने बताएका छन् ।

हालै माल्दिभ्समा सम्पन्न दक्षिण एसियाली फुटबलको सबैभन्दा ठूलो प्रतियोगिता साफ च्याम्पियनसिपको उपविजेता बनेको नेपाली टोलीालाई बधाई दिँदै शर्माले विशेष कार्ययोजना आवश्यक रहेको बताएका हुन् ।

अक्टोबर १ देखि गत शनिबारसम्म माल्दिभ्समा भएको साफ च्याम्पियनसिपको १३औं संस्करणमा नेपालले इतिहासमै पहिलो पटक फाइनल यात्रा तय गरेको थियो । यद्यपि, फाइनलमा नजिकको प्रतिद्वन्दी भारतसँग ३-० गोलको नतिजामा पराजित हुँदै नेपाल उपविजेता बनेको थियो ।

उपविजेता बनेर सोमबार बिहान स्वदेश फर्किएको नेपाली टोलीलाई युवा तथा खेलकुद मन्त्री महेश्वर गहतराज तथा समर्थकले विमानस्थलमा भव्य स्वागत गरेका थिए ।

सरकारले साफ उपविजेता टोलीलाई जनही पाँच लाख रूपैयाँ पुरस्कार दिने घोषणा गरिसकेको छ ।

सत्तारूढ दल काँग्रेसका प्रवक्ता शर्माले सरकारको त्यो निर्णय स्वागतयोग्य रहेको बताउँदै सरकारलाई धन्यवाद र ‘टीम नेपाल’लाई ट्वीटरमार्फत बधाई दिएका हुन् ।

देशको प्रतिस्ठा अभिवृद्धि गर्न खेलाडी समर्पित छन्, खेलाडीको क्षमता अभिवृद्धि गर्न बिशेष कार्ययोजना तय गर्न जरुरी… @PM_nepal_ !

साफ च्याम्पियनसिप फुटबलमा उपविजेता खेलाडीलाई जनही ५ लाख प्रोत्साहन रकम दिने सरकारको निर्णय स्वागत योग्य छ l धन्यवाद सरकार l बधाई `टिम नेपाल´ l

— Bishwa Prakash शर्मा (@bishwaprakash77) October 18, 2021