काबुलमा इस्लामिक स्टेट लक्षित अमेरिकी रकेट आक्रमण : तीन बच्चासहित एकै परिवारका नौजना मारिए

काबुल । काबुल छाड्ने समयसीमा सकिन एकदिन मात्र बाँकी रहँदा अमेरिकाले सम्भावित आत्मघाती हुनसक्ने कारण देखाउँदै सोमबार बिहान इस्लामिक स्टेटका लडाकु लक्षित रकेट आक्रमण गरेको छ ।

उक्त आक्रमणबाट काबुल एयरपोर्ट अगाडि विस्फोटक पदार्थ भरेर राखिएको एक कार ध्वस्त भएको छ । सीएनएनले अमेरिकी हमलामा एकै परिवारका ९ जना मारिएको जनाएको छ ।

अलजजिराले अमेरिकी रकेट आक्रमणमा सर्वसाधारण र बालबालिका मारिएको जनाएको छ । अमेरिकी सेनाको केन्द्रीय कमान्डले रकेट आक्रमणको मुख्य निशाना पुनः आत्मघाती आक्रमण गराउन सक्ने इस्लामिक स्टेटका लडाकुलाई तुल्याइएको बताएको छ ।

आक्रमणमा एक सामान्य परिवारकी २ वर्षिया बालिका र उनका दाजु मारिएका छन् । सेन्ट्रल कमान्डले ड्रोन आक्रमणपछि केही नागरिक हताहत भएको विवरण प्राप्त गरेको जनाएको छ ।

उसले घटनाबारे छानविन गरिरहेको जनाएको छ । गत बिहीवार इस्लामिक स्टेटका लडाकुले आत्मघाती बम आक्रमण गर्दा काबुलमा १३ जना अमेरिकी सैनिक सहित १७५ जना मारिएका थिए ।

प्रत्यक्षदर्शीका अनुसार पार्किङ राखिएको एक गाडीमा केही व्यक्तिले विस्फोटक पदार्थ राख्न लागेको बेला रकेड आक्रमण भएको थियो । नाम उल्लेख नगर्ने सर्तमा एक अधिकारीले इस्लामिक स्टेटका दुईजना लडाकु सो क्रममा मारिएको जनाए ।

अगस्ट ३१ मा काबुल छाड्ने तयारी गरिरहेको अमेरिकाले आइतबार ३६ घण्टाभित्र पुनः आतंकवादी आक्रमण हुनसक्ने भन्दै चेतावनी जारी गरेको थियो । अगस्ट १५ मा तालिबानले काबुललाई नियन्त्रणमा लिएपछि अमेरिका र उसका साझेदार मुलुकले १ लाख १४ हजार व्यक्तिलाई उद्धार गरेको छ ।