आफ्नो अभिव्यक्तिको गलत अर्थ लागेको भन्दै प्रशिक्षक अल्मुताइरीले माफी मागे

काठमाडौं । नेपाली फुटबल टिमका प्रमुख प्रशिक्षक अब्दुल्लाह अल्मुताइरीले एउटा अन्तरर्वार्तामा बोलेका कुराहरुलाई लिएर माफी मागेका छन् । आफ्ना अभिव्यक्तिको गलत अर्थ लागेको भन्दै उनले फुटबल खेलाडी, फ्यान, तथा नेपाली जनतासमक्ष माफी मागेका हुन् ।

अल्मुताइरीले सामाजिक सञ्जालमा लेखेका छन्, ‘मैले कही विषयमा बोलेको थिएँ, जसले नेपाली जनता र खासगरि भुतपूर्व खेलाडी र प्रशिक्षकहरुले गलत बुझे । त्यसका लागि माफी चाहन्छु ।’

उनले कसैप्रति आफ्नो दोष नरहेको बताएका छन् । नेपाल र नेपाली फुटबलमा गौरव गर्ने भन्दै उनले नेपाली टिमप्रति उच्च सम्मान रहेको उल्लेख गरेका छन् ।

प्रशिक्षक अल्मुताइरीले केही दिनअघि पदबाट राजीनामा गर्ने घोषणा गरेका थिए । तर, अहिलेसम्म राजीनामा बुझाएका छैनन् ।

केही दिनअघि एक अन्तरर्वार्तामा उनले नेपालमा खेलाडीसँगै खेलकुद पदाधिकारीहरुको मानसिकता पनि परिर्वतन हुनुपर्ने अभिव्यक्ति दिएपछि विवाद भएको थियो ।