म्यानमारमा सेनाविरुद्ध प्रदर्शन चर्कियो, इन्टरनेट सेवा सुचारु

काठमाडौं । सेनाको कू विरुद्ध म्यानमारमा प्रदर्शन चर्किएको छ । प्रदर्शनले ब्यापकता पाउँदै गर्दा अवरुद्ध इन्टरनेट सेवा पुनः सुचारु गरिएको छ ।

देशव्यापी हड्तालविरुद्ध सोमबार म्यानमार प्रहरीले पानीको फोहोर फ्याँकेर आन्दोलनलाई मत्थर पार्ने प्रयास गरेको छ । तेस्रो दिन पनि नागरिक सेनाविरुद्ध सडकमा उत्रिएर प्रदर्शन गरिरहेका छन् ।

राज्य नियन्त्रित टेलिभिजनबाट सेनाले कानुन उल्लंघन गर्नेलाई सजाय दिलाउने सन्देश प्रसारण गरिरहेको छ । तेस्रो दिनको प्रदर्शनलाई एक दशकपछिको ठूलो प्रदर्शन भनिएको छ ।

गत सोमबार त्यहाँको सेनाले बिना कुनै प्रमाण निर्वाचनमा धाँधली भएको भन्दै सत्ता आफ्नो हातमा लिएको थियो । लोकतन्त्रवादी नेतृ आङ सान सू चिसहित राष्ट्रपतिलाई पक्राउ गरिएको छ ।

सोमबार बिहानै ने पाइ त, मान्डले र याङ्गुनमा प्रदर्शनकारी भेला भएर सरकारविरुद्ध वृहत प्रदर्शन गरिरहेका छन् । शिक्षक, कानुन व्यवसायी, बैंक र सरकारी कर्मचारीले समेत प्रदर्शनमा भाग लिएका छन् ।

ने पाइ त सहरमा शान्तिपूर्वक प्रदर्शन गरिरहेकामाथि पूर्वजानकारी बिना प्रहरीले पानीको फोहोरा फ्याँकेको थियो । उक्त क्रममा केही घाइते भएपनि हिंसाका अन्य घटना चाहिँ भएको छैन ।