नेकपा विवाद संवैधानिक परिषदसम्म, सभामुख बैठकमा नजाने

काठमाडौं । नेकपा विवादको असर संवैधानिक परिषदमा समेत पर्ने देखिएको छ । प्रधानमन्त्री केपी शर्मा ओलीले डाकेको संवैधानिक परिषद बैठकमा सभामुख अग्नि सापकोटा सहभागी हुने छैनन् ।

पर्याप्त गृहकार्य र छलफल नभएको तथा तयारी नपुगेको भन्दै सभामुख सापकोटाले  हिजै फोनमार्फत आफू बैठकमा आउन असमर्थ रहेको जानकारी प्रधानमन्त्रीलाई गराएका थिए । पार्टीमा छलफल नगरि एकलौटी संवैधानिक अंगहरुमा प्रधानमन्त्री ओलीले नियुक्ति सिफारिस गर्न लागेको भन्दै अर्का अध्यक्ष प्रचण्ड असन्तुष्ट छन् ।

प्रचण्डको सुझाव मानेर सभामुख परिषद बैठकमा सहभागी नहुने नेकपा स्रोतले जनाएको छ । बैठक विहान ९ बजे प्रधानमन्त्री निवास बालुवाटारमा बोलाइएको छ ।

आजको बैठकमा विपक्षी दलका नेता शेरवहादुर देउवा भने सहभागी हुदैछन् । यसअघि आइतवार निर्धारित बैठकमा सभामुख र देउवा अनुपस्थित भएपछि स्थगित भएको थियो ।

सभामुख नगएपछि परिषद बैठक औपचारिक रुपमा बस्न नसक्ने भएको छ । उपसभामुख निर्वाचन नभएको अवस्थामा परिषदमा प्रधानमन्त्री, प्रधान न्यायाधीश, सभामुख, राष्ट्रियसभा अध्यक्ष र विपक्षी दलका नेतामात्र सदस्य छन् ।